«Агробанк» АТБ ташаббуси билан чоп этилган 100 китоб тўплами тақдимоти кеча 28 апрель куни, пойтахтдаги Hyatt Regency Tashkent меҳмонхонасида бўлиб ўтди. Бўлиб ўтган тақдимотда «Агробанк» АТБ масъул ходимлари, лойиҳа муаллифлари, олимлар ҳамда оммавий ахборот воситалари вакиллари иштирок этди.
Таъкидлаш ўринлики, президентнинг Олий Мажлисга йўллаган Мурожаатномасида келтирилганидек, камбағалликни қисқартириш ва аҳоли даромадларини кўпайтиришда энг тез натижа берадиган омил бу – қишлоқ хўжалигида ҳосилдорлик ва самарадорликни кескин ошириш.
Дарҳақиқат, жаҳон миқёсда аҳолининг озиқ-овқат хафсизлигини таъминлашда аграр соҳанинг ўрни ва аҳамияти ҳамда глобал бозорлардаги майдонларда асосий озиқ-овқат маҳсулотлари учун хомашё ҳисобланган буғдой, соя, маккажўхори нархи ошиб бормоқда.
Дунё бозорларида юзага келаётган бу каби ҳолатлар мавжуд ресурс ва имкониятлардан оқилона фойдаланиб, ҳосилдорлик ва манфаатдорликни янада ошириш, соҳага илм-фан ютуқлари ҳамда замонавий ёндашувларни жорий этиш долзарблик касб этмоқда. «Агробанк» АТБ республика қишлоқ хўжалиги соҳасининг ривожланишига ҳисса қўшиш учун нафақат молиявий, балки ижтимоий лойиҳалар билан ҳам аграр соҳага сармоя киритиши эътиборга моликдир.
Хусусан, банк ташаббуси билан қишлоқ хўжалигида замонавий билимларни татбиқ этиш, соҳада фермерлар, тадбиркорлар, деҳқон хўжаликлари ва аҳоли учун содда, тушунарли бўлган методологик қўлланмаларни тайёрлаш лойиҳаси амалга оширилди. Ушбу лойиҳани бошлашда Туркия Республикасида қишлоқ хўжалигининг турли йўналишлари бўйича тайёрланган ўқув тўпламлари ўрганиб чиқилди.
Бу каби қўлланмалар шу кунгача Ўзбекистонда алоҳида тўплам шаклида тайёрланмаган. Маҳаллий олимлар томонидан тайёрланган китоблар чекланган нашрда чоп этилган, кенг фойдаланувчилар қўлига етиб бормасдан, асосан илмий мутахассислар ва талабалар томонидан ўрганилган.
Эркин Қаҳҳоров, «Агробанк» бошқаруви раиси ўринбосари:
«Республикадаги олимлар ва қишлоқ хўжалиги маҳсулотлари етиштирувчиларига ҳар томонлама қулай ва Ўзбекистон иқлимига мос 100 китобдан иборат тўплам яратиш лойиҳаси устида иш олиб борилди. Бу лойиҳани амалга оширишда «Агробанк» қошида илмий гуруҳ ташкил этилди ва 120 нафардан ортиқ соҳа мутахассислари, олим ва ўқитувчилар жалб этилди.
Дастлабки босқичда, Тошкент давлат шарқшунослик институти билан ҳамкорликда Туркиядан олиб келинган қўлланмалар 20 нафар таржимонлар иштирокида ўзбек тилига таржима қилинди. Кейинги босқичда 7 та илмий муассасалардан 41 нафар илмий ходимлар, профессор ва ўқитувчилар жалб қилинди ҳамда маҳаллий олимларнинг илмий салоҳияти асосида юртимиз иқлими ва табиатига мос қўлланмалар тайёрланди.
Сўнгра тайёрланган қўлланмалар 52 нафар соҳа мутахассислари томонидан илмий ҳамда 4 нафар муҳаррирлар гуруҳи томонидан тақриздан ўтказилиб, дизайнерлар томонидан якуний чоп этиш ҳолатига келтирилди. Тўпламда қишлоқ хўжалиги соҳаси, жумладан, мева-сабзавот ва полиз экинлари, ғаллачилик, дон ҳамда дуккакли экинлар, чорвачилик, балиқчилик, асаларичилик каби тармоқларнинг энг илғор тажрибаларига оид, кенг қамровли илмий, амалий маълумотлар жамланди.
Бу тўпламда маҳсулотларни етиштиришдан ташқари касалликларга қарши курашиш, минерал ва маҳаллий ўғитлар турлари, қишлоқ хўжалиги техникалари тўғрисида ҳам маълумотлар берилган. Ушбу китобларни тайёрлаш ва чоп этиш билан боғлиқ бўлган барча харажатлар «Агробанк» томонидан молиялаштирилди.
Китобларни ҳаётга татбиқ этганимиздан сўнг шуни билдикки, яъни қишлоқ хўжалигига илм фан билан ёндашиш, ишлаб чиқиш ва интеграция қилиш учун нафақат китоб, балки ёшларимизни ўқитишни ўз олдимизга мақсад қилиб қўйдик. Шу билан бизнинг иккинчи лойиҳамиз — фермерлар мактаби лойиҳасига старт бердик. Бугундан бошлаб, Ўзбекистон Республикасининг 18 ва 35 ёш оралиғидаги фуқароларига fermermaktabi.uz сайтидаги сўровномада қатнашиб, бевосита мактабда ўқиш имкониятини яратиб бердик».
Айнан Туркия тажрибасини ўргандик, деб айтдингиз? Туркия ўзини қанчалик оқлади ва бу бизда қанчалик фойдали бўлади?
Туркия шароитида бу шунчалик ўзини оқлаганки, ҳозир тақдимотда эътибор берган бўлсангиз, Қишлоқ хўжалиги вазири ўринбосари Алишер Тўраев бир нарсани таъкидлаб ўтдилар. Яъни бу нарсанинг устида доимий изланишлар тўхтамаслиги керак. Озиқ-овқат хавфсизлиги глобал масала бўлгани учун доимий равишда такомиллашиб бориши лозим. Шу сабабдан, Туркияда қилинган бу тажриба ҳозиргача такомиллаштириб бориляпти. Туркиядаги 100 китоб лойиҳаси ҳозирги кунга келиб агро энциклопедия даражасига етишган. Бизнинг ҳам вазифамиз, мақсадимиз, келажакда буни агро энциклопедия даражасига етказиш.
Фермерлар мактаби онлайн тарзда бўлдими ёки оффлайн?
Фермерлар мактаби — бизнинг иккинчи лойиҳамиз. Сизга бир сирни очишим мумкин, бу оффлайн тарзда ўқитилади. Ўзбекистон Республикаси аҳолисининг ярми ёшлардан иборат, ўртача ёш 28 ёшни ташкил қилади. Ёшларимиз ўртасида қишлоқ хўжалигига бўлган қизиқишни орттириш, қолаверса қишлоқ хўжалиги тадбиркорлигига бўлган қизиқишни уйғотиш учун фермерлар мактабини ташкил этдик. Ёшларимиз ушбу мактабда таҳсил олиб, биринчи ўринда ўзининг қишлоқ хўжалигидаги илмини ривожлантиради ва бевосита маркетинг, менежмент, банк соҳасида, солиқ соҳасида маҳсулотни сота билишни ўраганади. Хуллас, бизнинг мактабимиздан тайёр тадбиркор, мутахассис бўлиб чиқади.
Мазкур тўпламлар босқичма-босқич чоп этилиб, республикамизнинг барча ҳудудларидаги фермерлар, тадбиркорлар ва деҳқон хўжаликларига етказилади. Шунингдек, кенг фойдаланувчилар оммасини қамраб олиш мақсадида, китобларнинг электрон нусхасидан банкнинг agrobank.uz интернет сайти, махсус Telegram боти орқали фойдаланиш имконияти яратилади.
Мазкур фермерлар мактабига ҳар йили 1000 нафар фермер ва деҳқон хўжаликлари раҳбарлари, томорқа ер эгалари ҳамда тадбиркорлар жалб қилиниб, аграр ўқув юртлари ўқитувчилари, соҳа мутахассислари ҳамда тадбиркорлар томонидан ўқитилиб, ўқитиш билан боғлиқ бўлган барча харажатлар «Агробанк» томонидан амалга оширилади.
«Агробанк» АТБ бу каби лойиҳаларни доимий тарзда амалиётга татбиқ этиш, соҳага замонавий билимларни олиб кириш орқали аҳоли ва мижозларга, фермер ҳамда тадбиркорларга доимий кўмакчи бўлиб боради.
Реклама ҳуқуқи асосида.
Изоҳ (0)