“Davlat soliq qo‘mitasi Birlashgan kasaba uyushmasi haqqoniy bo‘lsa, avval qo‘mita raisini sudga berishi lozim” — Rasul Kusherbayev

Oliy Majlis Qonunchilik palatasi deputati Rasul Kusherbayev Davlat soliq qo‘mitasi va uning tarkibiy bo‘linmalari xodimlari Birlashgan kasaba uyushmasi uni sudga berganiga munosabat bildirdi.

Eslatib o‘tamiz, Davlat soliq qo‘mitasi Rasul Kusherbayevning “Human.uz” axborot portalidagi “So‘z blogerlarga” ko‘rsatuvining 23-fevraldagi sonida aytgan haqoratomuz so‘zlarini sabab qilib, Fuqarolik ishlari bo‘yicha Shayxontohur tumanlararo sudiga da’vo arizasi kiritgandi. Qo‘mita deputatdan 4,6 milliard so‘m ma’naviy zarar undirmoqchi. Shuningdek, OAV orqali kechirim so‘rashini talab qilmoqda.

Ko‘rsatuvda deputat “Oddiy soliq qo‘mitasining xodimi yoki mutaxassisi yuk xati nima uchun kerak bo‘lishini, hatto u shunchalik bilmaydimi yo tadbirkorlar, yo odamlar shunchalik ahmoq deb o‘ylaydimiki, o‘zining qilayotgan ishini noto‘g‘ri emasligini isbotlashi uchun dalil sifatida yuk xatini ko‘rmoqchi… Pastkashlik bo‘lsa, shunchalik bo‘ladiki, soliq xodimi tadbirkordan yuk xatigacha so‘rayapti, uyidagi ‘tualetnaya bumaga’ning qanaqasini ishlatishini ham so‘ramabdi-da… Soliq organlari aylanib-o‘rgilib tadbirkorni aybdor deb topishim kerak, degan prinsip ketyapti…”, — deb aytgandi.

Qo‘mita Rasul Kusherbayev ushbu so‘zlar bilan soliq organlari xodimlarini asossiz ayblagan va ushbu xatti-harakatlari orqali soliq organlari xodimlari ishchanlik obro‘siga putur yetkazgan deb hisoblamoqda.

Deputatning o‘zi bu haqda “Podrobno.uz”ga quyidagicha munosabat bildirgan:

“Men hech kimni haqorat qilmadim, shunchaki tanqid qildim va biror bir davlat organi noqonuniy ish tutsa, tanqid qilishda davom etaman. Ammo aniq bilamanki, yaqinda Davlat soliq qo‘mitasi raisi qo‘l ostidagi xodimlarini haqorat qildi. Agar DSQ kasaba uyushmasi haqqoniy bo‘lsa, xodimlarning sha’ni va qadr-qimmatini haqiqatan ham himoya qilsa, u holda avval DSQ raisini sudga berishi lozim”.