Toshkent shahri Uchtepa tumanida internetda tanishgan qizlarining kiyimsiz foto va videolarini tarqatib yubormaslik uchun pul undirib kelgan yigit aniqlandi. Bu haqda IIV matbuot xizmati xabar berdi.
Ma’lum qilinishicha, J. ismli yigit Telegram’dagi guruhlardan birida N. ismli voyaga yetmagan qiz bilan tanishib, ishonchiga kirgan va qizning kiyimsiz holatdagi foto va videolarini qo‘lga kiritgan. Ularni internetda tarqatmaslik, diskka ko‘chirib, uning qarindoshlariga yubormaslik uchun qizdan 500 dollar talab qilgan. Qiz unga umumiy narxi 4 million so‘m bo‘lgan ayollar uzugini bergan.
Shu tariqa yana 4 nafar qizga tovlamachilik qilgan. Keyingi o‘ljasini qidirishga qiynalgan yigit yana voyaga yetmagan qiz N.ni bezovta qilib, 450 dollar talab qilib, qo‘rqitgan. Ilojsiz qolgan qiz huquq-tartibot idoralariga shikoyat qilishga majbur bo‘lgan.
Avvalroq Namanganda do‘stining nojo‘ya ko‘rinishdagi suratlarini tarqatish bilan tahdid qilib, undan 20 million so‘m talab qilgan shaxslar qo‘lga olingani, Samarqandda 21 yoshli qizning shaxsiy suratlarini tarqatib yubormaslik evaziga 400 dollar so‘ragan institut o‘qituvchisi ushlangani hamda bekobodlik ayolning eski Telegram akkauntidagi shaxsiy rasmlarini internetda tarqatib yubormaslik uchun undan 5 million so‘m so‘ragan 15 yoshli qiz ushlangani haqida xabar berilgan edi.
Izoh (0)