Toshkent viloyatida koronavirus bemorlari ko‘payayotgani bois COVID-poliklinika va call-sentrlar faoliyati qayta yo‘lga qo‘yildi. Bu haqda viloyat sog‘liqni saqlash boshqarmasi boshlig‘i To‘raqul Arziqulov ma’lum qildi.
“Toshkent viloyatida hozirda 479 nafar koronavirusga chalingan bemor bor. Zangiota-1 va Zangiota-2 ixtisoslashgan yuqumli kasalliklar shifoxonasida shulardan 332 nafari davolanmoqda. 147 nafar bemor esa klinik belgilari namoyon bo‘lmagani uchun uy sharoitida davolanib kelmoqda.
Toshkent viloyatidagi bemorlardan 36 nafariga bronxit pnevmoniya, ya’ni o‘pkaning yallig‘lanishi tashxisi qo‘yilayotgani kasallikning yana qaytayotganligidan darak beradi.
Viloyatda 237 ta tez tibbiy yordam brigadalari, mobil poliklinika hamda COVID-poliklinikalar ham faoliyatini tiklab, har bir tuman va shaharda call-sentrlar qayta ishga tushirildi.
Hozirgi vaqtda Zangiota tumanidagi Nazarbek sanatoriysi 350 o‘ringa mo‘ljallangan bo‘lib, shifoxonaga kislorod stansiyasi o‘rnatish ishlari yakunlanmoqda. Bundan tashqari Chirchiq shahrida 120 o‘rinli hamda Olmaliq shahridagi 140 o‘rinli yuqumli kasalliklar shifoxonasiga ham eng zamonaviy kislorod stansiyasi o‘rnatilmoqda.
Toshkent viloyati hokimining tegishli farmoniga asosan, dori zaxirasini 3 oyga yetkazish maqsadida 4 milliard 365 million so‘m pul ajratildi”, — deydi To‘raqul Arziqulov.
Bundan avval O‘zbekistonda “tez yordam”ga amalga oshirilgan chaqiriqlarning qariyb 1900 tasi asossiz bo‘lib chiqqani, O‘zbekistonga koronavirusni million marta kattalashtirib ko‘rsatadigan elektron mikroskop olib kelingani hamda O‘zbekiston bo‘yicha qancha maktab masofaviy ta’lim shakliga o‘tkazilgani ma’lum qilingani haqida xabar berilgandi.
Izoh (0)