AQShda Oq uy spikeri Jen Psaki Rossiya prezidenti Vladimir Putinning “qizil chiziqlar” haqidagi bayonotlariga izoh berib, AQSh bu so‘zlarni o‘ziga olmasligini aytdi. Bu haqda “Korrespondent.net” xabar berdi.

Foto: AP Photo

Bir kun oldin Putin parlamentga murojaat yo‘llash chog‘ida boshqa mamlakatlarni Rossiya bilan munosabatlarda “qizil chiziqlar”dan o‘tmaslik haqida ogohlantirdi. Aks holda, “Rossiya provokatorlarga assimetrik javob berish huquqini o‘zida saqlab qoladi”.

“O‘ylashimcha, prezident Putin aytayotgan gaplarni AQSh shaxsan bizga tegishli deb qabul qilmaydi”, — deb javob berdi u.

Psaki, shuningdek, AQSh Rossiyaning zararli xatti-harakatlari oqibatida yangi sanksiyalarni joriy qilganini eslatib o‘tdi.

“Biz hech qachon bir qator sanksiyalar xatti-harakatni darhol o‘zgartiradi deb kutmaganmiz va buni oldindan bashorat ham qilmaganmiz, ammo sanksiyalar Rossiyaning xatti-harakatlari qabul qilinishi mumkin emasligi va ularning davom etishiga yo‘l qo‘yilmasligi to‘g‘risida aniq signal beradi”, — dedi u.

Shu bilan birga, Psaki Vashington Moskva bilan barqaror va oldindan aytib bo‘ladigan munosabatlarni o‘rnatish istagida ekanini qo‘shimcha qildi. AQSh prezidenti Jo Bayden Putin bilan telefon orqali suhbatda bunga ishora qilgan.

Putin “qizil chiziqlar” bilan nimani nazarda tutganini uning matbuot kotibi Dmitriy Peskov quyidagicha izohladi: “Avvalo, bu bizning milliy manfaatlarimiz, tashqi va ichki xavfsizligimiz manfaatlariga hamda bizning saylovlarga yoki boshqa siyosiy jarayonlarga chetdan kimdir aralashishiga yo‘l qo‘ymaslik degani. Bu bizning mamlakatimiz bilan tajovuzkor muloqotning oldini olish, mamlakatimiz iqtisodiy manfaatlarining buzilishiga yo‘l qo‘ymaslik va boshqalarni anglatadi”.