Markaziy Osiyo davlatlari AQSh fuqarolarining tashrif buyurishi tavsiya etilmagan mamlakatlar ro‘yxatiga kiritildi. Bu haqda AQSh Davlat departamenti hisobotiga tayanib, Deutsche Welle xabar berdi.
Xabarga ko‘ra, AQSh sayohat qilish tavsiya etilmagan davlatlar ro‘yxatiga dunyo mamlakatlarining taxminan 80 foizini kiritishni rejalashtirmoqda. Davlat departamenti to‘rtinchi darajali xavfli davlatlar qatoriga 34 ta mamlakatni qo‘shdi. Ro‘yxatda, xususan, O‘zbekiston, Qozog‘iston, Qirg‘iziston, Turkmaniston, Tojikiston, Rossiya, Xitoy, Singapur, Eron, Braziliya, Argentina, Mozambik, Chad, Kosovo, Keniya va Tanzaniya kabi davlatlar bor. Shuningdek, unga yana 130 dan ortiq mamlakat kiritiladi.
“Ro‘yxatning yangilanishi sayohat qilmaslik tavsiyasi bilan to‘rtinchi darajali xavfli mamlakatlar sonining sezilarli darajada ko‘payishiga olib keladi, bu dunyodagi mamlakatlarning 80 foizini qamrab oladi”, — deyiladi AQSh Tashqi ishlar vazirligi bayonotida.
COVID-19 cheklovlari tufayli ilgari amerikaliklar uchun aksariyat Yevropa davlatlariga sayohat qilish taqiqlangan edi. Bundan tashqari, Vashington yaqin orada Yevropa, Xitoy, Braziliya, Eron va Janubiy Afrika davlatlarida bo‘lgan Amerika fuqaroligiga ega bo‘lmagan kishilarni AQShga kirish huquqidan mahrum qildi.
Ta’kidlanishicha, bunday tadbirlar sayohatchilarning sog‘lig‘i bilan bog‘liq masalalar bo‘yicha AQSh tibbiy nazorat organlarining ichki tavsiyalarini yaxshiroq bajarish uchun amalga oshirilmoqda
AQSh kasalliklarni nazorat qilish va oldini olish markazi (CDC) hozircha vaziyatga izoh bermadi.
Avvalroq Qo‘shma Shtatlarda koronavirusning to‘rtinchi to‘lqini yuz berayotgani ma’lum qilingandi. Ma’lumotlariga ko‘ra, AQShda koronavirusga chalinganlarning umumiy soni 28 milliondan oshadi, COVID-19 qurbonlari soni uchta urushdagi yo‘qotishlardan oshib ketgan. Shu munosabat bilan, fevral oyi oxirida Bayden koronavirusdan vafot etgan amerikaliklar uchun besh kunlik motam e’lon qildi.
Izoh (0)