Chexiya parlamenti Senati hukumat tomonidan Rossiya bosh razvedka boshqarmasi tashkillashtirganlikda ayblanayotgan Vrbetitsedagi portlashlarni “Yevropa Ittifoqi a’zosi bo‘lgan davlatga qarshi, demak butun Yevroittifoqqa qarshi davlat terrorizmi akti” deb atadi. Bu haqda Chexiya axborot agentligiga tayanib, Meduza xabar berdi.
Agentlik xabariga ko‘ra, Senatning 72 a’zosidan 67 nafari tegishli qarorni ma’qullab, ovoz bergan.
Senatorlar, shuningdek, Chexiya hukumatini Rossiya bilan do‘stona munosabatlar va hamkorlik to‘g‘risidagi shartnomani buzishga va Rossiyaning Pragadagi elchixonasida faqat bir nafar rossiyalik diplomatni qoldirishga chaqirdi.
Bundan tashqari, Senat a’zolari Vrbetitsedagi voqeani BMT Xavfsizlik Kengashi, NATO va Yevropa Ittifoqining boshqaruv organlari darajasida muhokama qilishga, Rossiyadan tovon puli talab qilishga va Rossiyani atom elektr stansiyasi hamda boshqa muhim infratuzilmalarni qurish bo‘yicha tenderlardan chetlatishga chaqirdi.
Avvalroq Deputatlar palatasi (Chexiya parlamentining quyi palatasi) ham Chexiya hukumatini shunday choralar ko‘rishga chaqirgan edi.
2014-yil Vrbetitse qishlog‘idagi o‘q-dorilar omborlarida sodir bo‘lgan portlashlar operatsiyasiga Rossiya razvedka boshqarmasining 29155-sonli harbiy qism boshlig‘i, general Andrey Averyanov shaxsan rahbarlik qilgani haqida The Insider va Bellingcat agentliklari tomonidan o‘tkazilgan surishtiruvida ma’lum qilindi.
Avvalroq Chexiya rasmiylari razvedka xizmatida ishlaganlikda gumon qilinayotgan Rossiya elchixonasining 18 nafar xodimi mamlakatdan chiqarib yuborilishi haqida e’lon qildi. Rossiya ayblovlarni bema’ni va asossiz deb atadi va Chexiyaning xatti-harakatlariga javob sifatida 20 nafar chexiyalik diplomatni mamlakatdan chiqarib yubordi.
Izoh (0)