Andijonda soliq bosh inspektori yo‘q qarzdorligi uchun fuqarodan pul olayotganida qo‘lga tushdi, deya xabar qilmoqda Bosh prokuratura huzuridagi Departament matbuot xizmati.
Qayd etilishicha, Departament, DXX va Davlat soliq qo‘mitasi (DSQ)ning Andijon viloyati boshqarmalari tomonidan fuqarolarning huquq va manfaatlarini himoya qilish yuzasidan tezkor tadbir o‘tkazilgan.
Unda Buloqboshi tumani Davlat soliq inspeksiyasi davlat soliq bosh inspektori M.X. o‘z xizmat mavqeyidan foydalanib, fuqaro A.ning otasiga tegishli 0,33 gektar noturar yer maydonining soliq qarzdorligi mavjud bo‘lmasa-da, ushbu yer maydoni bo‘yicha 30 million so‘m soliq qarzdorligi borligini aytib, ushbu qarzdorlikni bartaraf qilib berishi evaziga 15 million so‘mni firibgarlik yo‘li bilan olgan vaqtida ashyoviy dalillar bilan ushlangan.
Mazkur holat yuzasidan M.X.ga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Samarqandda fuqaroni 50 ming dollarga chuv tushirgan advokat ustidan jinoyat ishi qo‘zg‘atilgani, Jizzaxda korxonaga ajratilgan 185 million so‘m kreditni talon-toroj qilgan jamiyat rahbarining yana bir jinoyati fosh bo‘lgani hamda Olmazorda qariyb 36 million so‘mlik tilla taqinchoqlarini o‘g‘irlatganini aytgan ayolning o‘zi bu ishni qilgani aniqlangani haqida xabar berilgandi.
Izoh (0)