Андижонда солиқ бош инспектори йўқ қарздорлиги учун фуқародан пул олаётганида қўлга тушди, дея хабар қилмоқда Бош прокуратура ҳузуридаги Департамент матбуот хизмати.
Қайд этилишича, Департамент, ДХХ ва Давлат солиқ қўмитаси (ДСҚ)нинг Андижон вилояти бошқармалари томонидан фуқароларнинг ҳуқуқ ва манфаатларини ҳимоя қилиш юзасидан тезкор тадбир ўтказилган.
Унда Булоқбоши тумани Давлат солиқ инспекцияси давлат солиқ бош инспектори М.Х. ўз хизмат мавқейидан фойдаланиб, фуқаро А.нинг отасига тегишли 0,33 гектар нотурар ер майдонининг солиқ қарздорлиги мавжуд бўлмаса-да, ушбу ер майдони бўйича 30 миллион сўм солиқ қарздорлиги борлигини айтиб, ушбу қарздорликни бартараф қилиб бериши эвазига 15 миллион сўмни фирибгарлик йўли билан олган вақтида ашёвий далиллар билан ушланган.
Мазкур ҳолат юзасидан М.Х.га нисбатан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Бундан аввал Самарқандда фуқарони 50 минг долларга чув туширган адвокат устидан жиноят иши қўзғатилгани, Жиззахда корхонага ажратилган 185 миллион сўм кредитни талон-торож қилган жамият раҳбарининг яна бир жинояти фош бўлгани ҳамда Олмазорда қарийб 36 миллион сўмлик тилла тақинчоқларини ўғирлатганини айтган аёлнинг ўзи бу ишни қилгани аниқлангани ҳақида хабар берилганди.
Изоҳ (0)