Osiyo Chempionlar Ligasi 3-turi doirasidagi “Sharja” — “Paxtakor” o‘yinidan oldin matbuot anjumani o‘tkazildi. Unda “sherlar” bosh murabbiyi Piter Hyuistra va jamoa yarim himoyachisi Sardor Rashidov ishtirok etdi.

Foto: “Paxtakor”

Bizni uch kun ichida “Sharja” bilan o‘tadigan ikki o‘yin kutmoqda. Bunday qisqa muddatda bir raqib bilan to‘qnash kelishni o‘ziga xos holat deb aytish mumkin. Jamoalar uchun qiziqarli to‘qnashuv bo‘ladi. Biz o‘yinga yaxshi tayyorlanyapmiz. Raqibning avvalgi bellashuvlarini tahlil qilib chiqdik. G‘alaba uchun maydonga tushamiz.

“Sharja” guruhda to‘rt ochko bilan peshqadamlik qilmoqda. Shu sababli bu jamoani uchrashuvdan avval ustunlikka ega deb hisoblayman. Ularda yaxshi jamoa shakllangan, saviyali futbolchilari bor.

Jamoalar uchun haqiqiy sinov to‘rtinchi o‘yindan boshlanadi. Futbolchilarning jismoniy holatini tetik holda saqlash, ruhiy tayyorgarligi ustida ishlash oson bo‘lmaydi. Shuning uchun butun jamoa, murabbiylar shtabi uchun qiziq davr. Ramazon oyi ekani sababli jamoani tetik ushlab turishda ko‘p ishlash kerak.

Piter Hyuistra, “Paxtakor” bosh murabbiyi

Shuningdek, Rashidov ham o‘yin haqidagi fikrlari bilan o‘rtoqlashdi.

Foto: “Paxtakor”

Ertaga qiziqarli futbol bo‘ladi. “Sharja” — yaxshi jamoa, lekin biz faqat g‘alaba uchun maydonga chiqamiz. Yutuq bilan guruhda peshqadamga aylanib olishni xohlaymiz. Bu bellashuv deyarli olti ochkolik to‘qnashuvga aylanadi. Maqsadimiz faqat g‘alaba.

“Al-Jazira”da (BAA klubi, Sardor 2017—2018-yillarda ushbu jamoada to‘p surgan — “Daryo”) o‘ynagan paytim “Sharja” kuchayib, chempionga aylangandi. Lekin endi “Paxtakor”da o‘ynayapman. Bu Chempionlar Ligasi, umuman boshqa musobaqa. Biz o‘zbek futbolining kuchini ko‘rsatishni istaymiz. Jamoadoshlarim bilan bor kuchimizni bergan holda yutuqqa erishishni istaymiz.

Sardor Rashidov, “Paxtakor” yarim himoyachisi

Eslatib o‘tamiz, “Sharja” va “Paxtakor” o‘rtasidagi uchrashuv 20-aprel kuni Toshkent vaqti bilan 23:00 da boshlanadi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!