Namangan shahri tarkibida yer maydoni 8 223 gektar bo‘lgan Yangi Namangan tumani tashkil etiladi. Bu haqdagi Qonunchilik palatasi qarori loyihasi deputatlar tomonidan ko‘rib chiqilmoqda.
Oliy Majlis Qonunchilik palatasi matbuot xizmatining qayd etishicha, Namangan shahri 1926-yilda tashkil etilgan bo‘lib, bugungi kunda uning aholisi 640,1 ming nafarni, umumiy yer maydoni 18 ming gektarni tashkil etadi. 2019-yilda Chortoq va Namangan tumanlaridan 57 ming nafar aholi istiqomat qiluvchi hududlar hamda 6,3 ming gektar yer maydonlari qo‘shilganligi sababli, ushbu hududda yashovchi aholining shahar markaziga qatnovida muammolar yuzaga kelmoqda.
Shuningdek, xizmat ko‘rsatuvchi tibbiyot muassasalari shahar markazidan 15-20 kilometr uzoqlikda joylashganligi, sanoat korxonalarining kamligi ushbu hududda yashovchi aholining haqli e’tirozlariga sabab bo‘lib kelmoqda.
Prezident Shavkat Mirziyoyev 2021-yil 18—19-fevral kunlari Namangan viloyatiga tashrifi davomida Namangan shahar hududini ijtimoiy-iqtisodiy rivojlantirish maqsadida Yangi Namangan tumanini tashkil etish taklifini kiritgan edi. Ushbu taklif xalq deputatlari Namangan shahar kengashi hamda Namangan viloyati kengashining qarorlari bilan ma’qullangan.
Qabul qilingan qarorga muvofiq, Namangan shahrida joylashgan 79 ta mahalladan 24 tasi, 70 ta maktabgacha ta’lim muassasasidan 40 tasi, 85 ta umumta’lim maktabidan 21 tasi, 6 ta oilaviy poliklinikadan 2 tasi va 52 ta kasalxonaning 12 tasi Yangi Namangan tumani tarkibiga o‘tkazilmoqda.
Yangi tuman hududida 16 ta sanoat korxonalari va 4 ta kichik sanoat zonasi barpo etiladi. Tashkil etilayotgan kichik sanoat zonalarida 245 milliard so‘mlik 62 ta loyihada 2600 ta yangi ish o‘rni yaratish belgilanmoqda.
Namangan shahrining “Mingterak”, “Bunyodkor”, “Mustaqillikning 5 yilligi”, “Axsikent”, “Mashrab”, “Ma’naviyat”, “Furqat”, “Guliston”, “Beruniy”, “Mingchinor”, “Tinchlik”, “Yoshlik”, “Oromgoh”, “Atangan guzar”, “Yangi zamin”, “Mehnatobod”, “Sihatgoh”, “Go‘zal”, “Chamanzor”, “Ishonch”, “Sherbuloq”, “Kelajak tongi”, “Sohil” va “Istiqbol” mahalla fuqarolar yig‘inlarining hududlari Yangi Namangan tumani tarkibiga o‘tkaziladi.
Eslatib o‘tamiz, Oliy Majlis Senatining 2020-yil 11-sentabrdagi qarori bilan Davlatobod tumani qayta tashkil etilgan va uning rahbariyati tayinlangan edi. Namangan shahri tarkibida avval ham Davlatobod tumani bo‘lgan, biroq 2004-yilda ushbu tuman tugatilgandi.
Izoh (0)