Jizzax viloyatining Sharof Rashidov tumanida kredit mablag‘larini talon-toroj qilgan jamiyat rahbarining yana bir firibgarligi fosh bo‘ldi, deb xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti matbuot xizmati.
Departamentning Sharof Rashidov tuman bo‘limi tomonidan o‘tkazilgan tergovga qadar tekshiruvda “A.Q.” xususiy korxonasi rahbari O.J. va boshqalar korxonaga bank muassasasidan ishlab chiqarish uskunalarini xarid qilish uchun ajratilgan 185 million so‘m kredit mablag‘larini boshqa maqsadlarda sarflab, o‘zlashtirish va rastrata qilish yo‘li bilan talon-toroj qilgani aniqlangan.
Shuningdek O.J. fuqaro N.ga tadbirkorlik faoliyatini yo‘lga qo‘ygach, katta daromad olishga va’da berib, evaziga uning 162 million so‘m naqd pullarini firibgarlik yo‘li bilan qo‘lga kiritgan.
Mazkur holat yuzasidan Jinoyat kodeksining 167-moddasi (talon-toroj qilish) va 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Toshkent viloyatida 173 million so‘mni talon-toroj qilgan maktab direktoriga jinoyat ishi qo‘zg‘atilgani haqida xabar berilgan edi.
Izoh (0)