Наманган вилоятининг Чуст туманидаги Каркидон қишлоғида яшовчи Марғуба Неъматуллаева каштада Леонардо да Винчининг машҳур «Мона Лиза» асарини акс эттирди. Бу ҳақда «Дарё» мухбири Азизбек Абдувалиев хабар бермоқда.
Марғуба 47 ёшда, касби ўқитувчи. Наманган ва Фарғонадаги мактаб, коллеж ва спорт мактабларида 20 йилдан ошиқ вақт мобайнида жисмоний тарбиядан дарс берган.
У жозибали табассуми туфайли ёқтириб қолгани «Мона Лиза»ни яратиш учун 6 ой вақт сарфлади. Бунинг учун 10 минг маротаба игна-ип ўтказган, 46 хил рангдан фойдаланилган. Ўзининг айтишича, бу рекорд эмас экан. «Жоконда»дан ўлчами кичик бўлган мева натюрмортини тайёрлашда 86 минг марта игна-ип ва 120 хил ранг қўлланган. Шу сабаб у замонавий каштачиликнинг математика ва аниқ ҳисоб-китобни ёқтирадиган санъат турига қиёслайди.
«Кўргазмалардан бирида «Aгар Леонардо да Винчи шу асарини чизишдан аввал ўзбек аёлини кўрганида ‘Мона Лиза’ албатта, сизлардан андоза олинган бўларди» деб лутф қилишди. Самарқанддаги тадбирга олиб борганимда бу портрет учун италиялик меҳмонлар 1000 доллар таклиф этишди. Бергим келмади, чунки бу қўл меҳнати, унинг баҳоси аслида бир неча карра юқори эканлигини биламан», — дейди у.
Қаҳрамонимизнинг айтишича, дўппи тикиш ва каштачиликка болалигидан қизиққан. Уйида ҳозиргача онаси 15 ёшида тиккан кашталар сақланади. 2013 йилда Тошкентга, Гёте институтига борганида замонавий каштачилик қандай бўлишини кўриб, маҳорат сабоқлари олганидан сўнг иштиёқи қайтадан уйғонган.
«Ҳозир бўш қолдим дегунча қўлимга игна-ип оламан. Беҳуда гап-сўз, кўча кезишларга вақтим ҳам, хоҳишим йўқ. Табиат, гул ва мевалар, жониворларни акс эттиришни яхши кўраман. Кичикроқ асарни тайёрлаш учун бир ой, каттароқларига эса 4-6 ой муддат кетади. Каштачиликдан толиққан пайтим волейбол ёки баскетбол ўйнайман, сузиш билан шуғулланаман, дутор чаламан. 14 ёшга тўлган қизим Хушрўй ёнимга кириб қолди. У ҳам кашта тикади, дутор чалади. Яқинда қўл жанги бўйича Ўзбекистон чемпиони бўлди. Ўғилларим Хушрўз ва Хушнуд эса Бухоро тиббиёт институти ҳамда Жанубий Кореянинг Кёнгсан университети талабалари. Улар билан жуда фахрланаман», — дейди Марғуба.
Марғуба Неъматуллаеванинг асарлари ҳозир Россиянинг Самарада шаҳридаги ўзбек ресторанларини безаб турибди. У келгусида ҳам каштачиликни ташлаб қўйиш ниятида эмас. Қўқонда бўлиб ўтадиган халқаро ҳунармандчилик фестивалига астойдил тайёргарлик кўрмоқда. Яқин орада эса яна бир машҳур мусаввир — Рембрандт асарларини каштага кўчирмоқчи.
Изоҳ (0)