Bosh prokuratura huzuridagi Departament tomonidan davlat xaridlarida narxlarni oshirib yuborish holatlari yuzasidan o‘tkazilgan tergovga qadar tekshiruvda Madaniyat vazirligi mansabdorlari musiqa asboblarini haqiqiy bozor bahosidan qimmatga sotib olib, budjet mablag‘larini talon-toroj qilgani aniqlandi.
Ma’lum bo‘lishicha, Madaniyat vazirligi huzuridagi “Yagona buyurtmachi xizmati” injiniring kompaniyasi mansabdor shaxslari va boshqalar oldindan til biriktirib, musiqa asboblarini sotib olish yuzasidan o‘tkazilgan tender tanlovida 3,3 milliard so‘mga yetkazib berish taklifi mavjud bo‘lsa-da, muqobil qimmatroq variantni ko‘rsatgan tadbirkorlik subyektini asossiz ravishda tanlovda g‘olib sifatida ko‘rsatgan.
Natijada musiqa asboblari haqiqiy bozor bahosidan 792,2 million so‘mga qimmat narxda sotib olinib, budjet mablag‘lari talon-toroj qilingan.
Holat yuzasidan kompaniya mansabdor shaxslari va boshqalarga nisbatan Jinoyat kodeksining 167-moddasi (talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Eslatib o‘tamiz, 2020-yilning noyabr oyida Bosh prokuraturada tashkil etilgan korrupsiya masalalariga oid idoralararo yig‘ilishda Madaniyat vazirligidagi jinoiy sxema fosh qilingandi. Xususan, grim uchun ajratilgan mablag‘ga “O‘rikzor”dan arzon kosmetika sotib olinib, budjetdan 2,3 milliard so‘m mablag‘ talon-toroj qilingan.
Shuningdek, vazirlik ishlar boshqarmasi boshlig‘i teatr va musiqiy maktablarga aslida yetkazib berilmagan mebel va musiqa anjomlari yetkazib berilgani haqida soxta hujjatlar tuzib, 1,7 milliard so‘mni o‘ziga tanish firmalarga o‘tkazib, talon-toroj qilgan. Bundan tashqari, 13,5 milliard so‘mlik mebel va jihozlarni tanishlaridan 20,2 milliard so‘mga olish yo‘li bilan 6,7 milliard so‘m ham talon-toroj qilingan. Bu jinoiy sxema bilan 12 milliard so‘m budjet mablag‘i o‘marilgan.
Ozodbek Nazarbekov Madaniyat vazirligidagi korrupsion holatlar haqida to‘xtalib o‘tib, “elakni ko‘tarishni o‘zi iltimos qilganini” bildirib o‘tgan.
Moliya vazirligi 2020-yilda O‘zbekistonda eng ko‘p moliyaviy qonunbuzilish holatlari qaysi vazirliklarda kuzatilganini ma’lum qilgandi. Unda Madaniyat vazirligida 6,8 milliard so‘m moliyaviy qonunbuzilish holatlari aniqlangani qayd etilgan.
Izoh (0)