Surxondaryo viloyati Denov tumanidagi tug‘ruq kompleksida ayollar farzandlarini yerda tug‘ayotgani haqida xabarlar ijtimoiy tarmoqlarda tarqaldi. “Zamon” informatsion dasturi Surxondaryo 2-son viloyat perinatal markazi direktori Baxtiyor Do‘stmurodov bilan bog‘lanib, holatga oydinlik kiritdi.
Ma’lum bo‘lishicha, tuman tibbiyot birlashmasining tug‘ruq kompleksi kapital ta’mirlash uchun vaqtinchalik yopilgani va joy yetishmasligi oqibatida shu holat kelib chiqqan.
Baxtiyor Do‘stmurodovning aytishicha, Denov tumani tibbiyot birlashmasi tug‘ruq kompleksining tug‘ruq bo‘limlari jami 60 o‘ringa mo‘ljallangan va Denov tumanida Surxondaryo 2-son perinatal markazi bor, u qo‘shni tumanlardagi 5 ta tumanni: Sarosiyo, Oltinsoy, Sho‘rchi, Uzun va Denov tumanlarining chala, og‘ir kasallik bilan yoki muddatdan ilgari tug‘ilishi mumkin bo‘lgan chaqaloqlarning barchasini qabul qilishi kerak.
“Tuman tibbiyot birlashmasining tug‘ruq kompleksi 1-apreldan 19-aprelga qadar kapital ta’mirlash uchun vaqtinchalik yopilgani munosabati bilan 2-son perinatal markazi Denov tumanida joylashgan bo‘lganligi uchun ularning bemorlarini ham vaqtincha o‘ziga olgan. Lekin bizda ham tug‘ruq o‘rinlari 60 ta, bir kunda 30-40 tagacha, ayrim kunlarda 51 tagacha tug‘ruq bo‘lmoqda.
Tug‘ruq ko‘p bo‘lgani tufayli ayollar sig‘may qolishdi. Hattoki tuman tibbiyot birlashmasidan 10 ta karavot olib kelib, zaxira joy ham qildik, o‘shanda ham yetkaza olmadik. Bir kunda tug‘ruq soni 51 taga yetgani uchun o‘sha kunlarda 2-3 soat tug‘gan ayollarga joy muammosi bo‘lib qolgan. U muammo o‘sha kunning o‘zidayoq bartaraf qilinib, yana 16 ta zaxira joy tayyorlab qo‘yildi. Muammoni hal qilganmiz va bizda boshqa muammo yo‘q”, — degan Surxondaryo 2-son viloyat perinatal markazi direktori.
Izoh (0)