Бош прокуратура ҳузуридаги Департамент томонидан давлат харидларида нархларни ошириб юбориш ҳолатлари юзасидан ўтказилган терговга қадар текширувда Маданият вазирлиги мансабдорлари мусиқа асбобларини ҳақиқий бозор баҳосидан қимматга сотиб олиб, бюджет маблағларини талон-торож қилгани аниқланди.
Маълум бўлишича, Маданият вазирлиги ҳузуридаги «Ягона буюртмачи хизмати» инжиниринг компанияси мансабдор шахслари ва бошқалар олдиндан тил бириктириб, мусиқа асбобларини сотиб олиш юзасидан ўтказилган тендер танловида 3,3 миллиард сўмга етказиб бериш таклифи мавжуд бўлса-да, муқобил қимматроқ вариантни кўрсатган тадбиркорлик субъектини асоссиз равишда танловда ғолиб сифатида кўрсатган.
Натижада мусиқа асбоблари ҳақиқий бозор баҳосидан 792,2 миллион сўмга қиммат нархда сотиб олиниб, бюджет маблағлари талон-торож қилинган.
Ҳолат юзасидан компания мансабдор шахслари ва бошқаларга нисбатан Жиноят кодексининг 167-моддаси (талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, 2020 йилнинг ноябрь ойида Бош прокуратурада ташкил этилган коррупция масалаларига оид идоралараро йиғилишда Маданият вазирлигидаги жиноий схема фош қилинганди. Хусусан, грим учун ажратилган маблағга «Ўрикзор»дан арзон косметика сотиб олиниб, бюджетдан 2,3 миллиард сўм маблағ талон-торож қилинган.
Шунингдек, вазирлик ишлар бошқармаси бошлиғи театр ва мусиқий мактабларга аслида етказиб берилмаган мебель ва мусиқа анжомлари етказиб берилгани ҳақида сохта ҳужжатлар тузиб, 1,7 миллиард сўмни ўзига таниш фирмаларга ўтказиб, талон-торож қилган. Бундан ташқари, 13,5 миллиард сўмлик мебель ва жиҳозларни танишларидан 20,2 миллиард сўмга олиш йўли билан 6,7 миллиард сўм ҳам талон-торож қилинган. Бу жиноий схема билан 12 миллиард сўм бюджет маблағи ўмарилган.
Озодбек Назарбеков Маданият вазирлигидаги коррупцион ҳолатлар ҳақида тўхталиб ўтиб, «элакни кўтаришни ўзи илтимос қилганини» билдириб ўтган.
Молия вазирлиги 2020 йилда Ўзбекистонда энг кўп молиявий қонунбузилиш ҳолатлари қайси вазирликларда кузатилганини маълум қилганди. Унда Маданият вазирлигида 6,8 миллиард сўм молиявий қонунбузилиш ҳолатлари аниқлангани қайд этилган.
Изоҳ (0)