Latviyaning to‘liq uzatmali zirhlangan avtomobillarni ishlab chiqaruvchi Dartz kompaniyasi Nikrob kompaniyasi bilan birlashib “Yevropadagi eng arzon avtomobil” deya e’tirof etilayotgan Freze Nikrob modelini taqdim etdi, deb xabar beradi IXBT. Mashinaning boshlang‘ich narxi 10 ming yevroni tashkil etadi.
Ushbu model Litvada mart oyida sotuvga chiqqan bo‘lib, Dartz’ning ma’lum qilishicha, karshering va yetkazib berish xizmati bilan shug‘ullanuvchi kompaniyalar tomonidan mashinaga yuqori talab bo‘lmoqda. Freze Nikrob modeli Xitoyning mashhur Wuling Hongguan Mini elektromobilining nusxasi hisoblanadi.
“Bozorda B va C klassiga kiruvchi takliflar ko‘p, ammo arzon va u qadar katta bo‘lmagan shahar avtomobillari bozori deyarli bo‘sh”, — deyiladi xabarda.
Mazkur elektromobilga 13,8 kilovatt/soatli akkumulyator batareyalari o‘rnatilgan bo‘lib, u bir marta quvvatlanish orqali 200 kilometrga yaqin yo‘lni bosib o‘tadi. Orqa tomoniga o‘rnatilgan elektrodvigatel 13 kVt quvvatni va 85 Nm aylanuvchi momentni taqdim etadi. Maksimal tezligi — 100 kilometr/soat.
Xohlovchilarga sig‘imi kattaroq bo‘lgan akkumulyator, interyeri veganlarga xos materiallar bilan qoplangan va boshqa qator yangiliklarga ega premium versiya 15 ming yevrodan taklif etilmoqda.
Izoh (0)