Xorvatiyadagi qorbo‘ronlar transport tizimining ishdan chiqishiga sabab bo‘ldi (video)

Xorvatiyaning ko‘plab hududlarida sodir bo‘lgan kuchli qorbo‘ronlar yo‘llardagi transportlar harakatini qiyinlashtirdi. Bu haqda Vecernji List nashriga tayanib “Korrespondent.net” xabar berdi.

Mamlakat poytaxti Zagreb, shuningdek, Split, Riyeka va Karlovats shaharlari qor bilan qoplandi. Bundan tashqari, qorbo‘ron Xorvatiyaning shimoli-g‘arbiga — Adriatik dengizi sohillaridagi Dalmatsiya hududigacha yetib bordi.

Noqulay ob-havo sharoiti tufayli asosiy avtomobil yo‘llarida katta tirbandliklar hosil bo‘ldi, hukumat yuk tashuvchi transportlar harakatini cheklab qo‘ydi.

Ba’zi shaharlar bir necha soat ichida 10 santimetr qalinlikdagi qor bilan qoplandi. Sinoptiklar bunday ob-havoning bir necha kun davom etishini bashorat qilmoqda.

Avvalroq Qozog‘iston poytaxti Nur-Sultonda qor bo‘roni sodir bo‘ldi. Kuchli qor va qattiq shamol tufayli atrofni ko‘rib bo‘lmay qolgan. Sinoptiklarning xabar berishicha, shamol tezligi soniyasiga 20 metrni tashkil qilgan.

AQShning Kolorado, Vayoming va Janubiy Dakota shtatlarida ham kuchli qor va yomg‘ir yog‘di. Shu bilan birga, mamlakatning shimoli-sharqidagi ba’zi shtatlarda yog‘ingarchilik miqdori, taxminan, 70 santimetrni tashkil qildi.