Toshkent shahar Yashnobod tumanining ichki yo‘llari ta’mirlanishiga ajratilgan pullar talon-toroj qilingani aniqlandi, deya xabar bermoqda Bosh prokuratura huzuridagi departament matbuot xizmati.

Foto: Bosh prokuratura huzuridagi Departament matbuot xizmati

Departamentning Yashnobod tuman bo‘limi tomonidan o‘tkazilgan tergovga qadar tekshiruvda, buyurtmachi Yashnobod tumani obodonlashtirish boshqarmasi, bosh pudratchi “T.Y.” va yordamchi pudratchi “T.O.” MChJ mansabdor shaxslari tumandagi 6 ta ichki yo‘llarni ta’mirlash ishlari bo‘yicha tuzilgan hujjatlarga soxta ma’lumotlar kiritib, amalda 278 million so‘mlik yo‘l qurilish va ta’mirlash ishlarini bajarmasdan, budjet mablag‘larini o‘zlashtirish yo‘li bilan talon-toroj qilgani aniqlangan.

Foto: Bosh prokuratura huzuridagi Departament matbuot xizmati

Mazkur holat yuzasidan Jinoyat kodeksining 167-moddasi (talon-toroj qilish) va 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.

Bundan avval sog‘liqni saqlash sohasida 30 mlrd so‘mdan ortiq mablag‘ talon-toroj qilingani, Jizzaxda mansabdorlar obuna uchun o‘tkazilgan 192 million pulni talon-toroj qilgani hamda Buxoroda bandlik markazi mansabdorlari 134 mln so‘m budjet mablag‘larini talon-taroj qilgani ma’lum bo‘lgani haqida xabar berilgandi.