Тошкент шаҳар Яшнобод туманининг ички йўллари таъмирланишига ажратилган пуллар талон-торож қилингани аниқланди, дея хабар бермоқда Бош прокуратура ҳузуридаги департамент матбуот хизмати.
Департаментнинг Яшнобод туман бўлими томонидан ўтказилган терговга қадар текширувда, буюртмачи Яшнобод тумани ободонлаштириш бошқармаси, бош пудратчи «Т.Й.» ва ёрдамчи пудратчи «Т.О.» МЧЖ мансабдор шахслари тумандаги 6 та ички йўлларни таъмирлаш ишлари бўйича тузилган ҳужжатларга сохта маълумотлар киритиб, амалда 278 миллион сўмлик йўл қурилиш ва таъмирлаш ишларини бажармасдан, бюджет маблағларини ўзлаштириш йўли билан талон-торож қилгани аниқланган.
Мазкур ҳолат юзасидан Жиноят кодексининг 167-моддаси (талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Бундан аввал соғлиқни сақлаш соҳасида 30 млрд сўмдан ортиқ маблағ талон-торож қилингани, Жиззахда мансабдорлар обуна учун ўтказилган 192 миллион пулни талон-торож қилгани ҳамда Бухорода бандлик маркази мансабдорлари 134 млн сўм бюджет маблағларини талон-тарож қилгани маълум бўлгани ҳақида хабар берилганди.
Изоҳ (0)