Yaqinda fransuz tilida efirga uzatilishni boshlagan CGTN Xitoy davlat telekompaniyasining veb-saytida chop etilgan maqolada “Xitoyda yetti yildan beri yashayotgan fransiyalik erkin jurnalist” qandaydir Loren Bomon uyg‘urlarning genotsid va ta’qiblariga oid ayblovlarni rad etdi. Bu haqda Le Monde gazetasi xabar berdi.
Foto: tjournal.ru
CGTN veb-saytida Loren Bomon “Fransiyalik jurnalist-frilanser”deyilgan bo‘lib, u “qariyb yetti yildan beri yashab kelayotgan Pekinga kelishidan oldin Parijning turli xil nashrlarida” ishlagan.
Biroq Le Monde bu nom Fransiya professional jurnalistlari guvohnomasi komissiyasi tomonidan ro‘yxatga olinmagani va unga matbuot kartalari berilmaganini aytmoqda.
Le Monde, shuningdek, shubhaga soladigan “nofaollik” haqida ta’kidlab, Xitoyda ko‘p yillar yashagan va “Fransiyada bir nechta nashrlarda ishlagan” jurnalist sifatidagi obro‘siga qaramasdan, ijtimoiy tarmoqlarda Bomonning deyarli birorta materiali chiqmaganini qo‘shimcha qildi.
2021-yilning mart oyida Bomon nomi bilan ochilgan Twitter akkauntidagi profil fotosurati fotobazadan olingan bo‘lib, boshqa shaxsga tegishli.
Loren Bomon CGTN veb-saytidagi materialida uyg‘ur ayollar sterilizatsiyasini va musulmon ozchilikning majburiy mehnatini qoralaydiganlar tomonidan tuzilgan ayblovlarni rad etadi.
Uning ta’kidlashicha, yirik xorijiy brendlarning Shinjon paxtasidan foydalanishni to‘xtatish to‘g‘risidagi qarori “sabr kosani to‘ldirdi”. Bomon o‘zi “uyg‘urlar ishining hissiyotga berilgan tarafdorlari” deb ataydigan tadqiqotchilarning ma’lumotlariga qaramasdan, Xitoyda qayta tarbiyalash lagerlari yo‘qligini aytgan.
CGTN kanalining fransuz tilidagi veb-sayti jurnalistning “o‘ylab topilishi” bo‘yicha ayblovlarni rad etmoqda. CGTN Loren Bomonning Shinjonda yashashi to‘g‘risida “aniq dalillar”, shuningdek, “ko‘plab fotosuratlari va hattoki mazkur shahar fuqarosi bo‘lgan kishi bilan nikohi to‘g‘risidagi guvohnomaning nusxasi” borligini da’vo qilmoqda.
Kanal veb-sayti bu nom jurnalistning taxallusi ekanini va ortiq uning qo‘llanilmasligini aytdi: “o‘zi va oilasining xavfsizligidan xavotirlanib, Loren Bomon taxallusi ostidagi jurnalist kelajakda bu nomdan foydalanmaslikka qaror qildi”.
“Biz fransuz jurnalistlari Xitoy foydasiga o‘z fikrini bildirgan taqdirda, qanday xavfga qolishini bilamiz”, —deyiladi telekanal xabarida.
Avvalroq Xitoyda paxta yetishtirishda uyg‘urlar majburiy mehnatga jalb qilinishi haqidagi bayonot sabab H&M va Nike mahsulotlariga qarshi norozilik kampaniyasi boshlangani, AQSh Xitoydagi Shinjon qurilish va ishlab chiqarish korpusi bilan bog‘liq kompaniyalardan paxta hamda tekstil mahsulotlarining importiga taqiq qo‘ygani haqida xabar berilgan edi.
Shinjonda sodir bo‘layotgan voqealar muhokamasi Xitoydagi eng mojaroli mavzulardan biri hisoblanadi. Mahalliy ijtimoiy tarmoqlarda foydalanuvchilar hududdagi vaziyat muhokamasi, u yerdagi holatlarni shunchaki eslab o‘tgani tufayli ham tez-tez bloklanadi. Human Rights Watch huquqni himoya qiluvchi tashkiloti tahlilchilari g‘arb brendlariga qarshi kampaniyaning hukumat uchun jiddiy oqibatlar olib kelishi mumkinligini taxmin qilgan. Sababi avval Shinjonda uyg‘urlarning huquqlari poymol bo‘layotgani haqida bilmagan foydalanuvchilar vaziyatga jiddiy qiziqishni va ijtimoiy tarmoqlarda u yerda haqiqatan nima bo‘layotgani haqida axborot izlashni boshlab yuborgan.
