29 март куни Олий Мажлис Сенатида бўлиб ўтган Коррупцияга қарши курашиш Миллий кенгашининг навбатдаги йиғилишида мамлакатдаги коррупция ҳолати таҳлил қилинди, деб хабар беради «UzNews.uz»
Қайд этилишича, Коррупцияга қарши курашиш агентлигига шу кунга қадар 1884 та мурожаат келиб тушган. Мурожаатчиларнинг 15 фоизи суд, 6 фоизи прокуратура органлари қарорларидан норози.
Шунингдек, мурожаатчиларнинг 6 фоизи маҳаллий ҳокимликлар мансабдор шахслари, хўжалик бошқаруви ва ички ишлар органлари ҳамда таълим тизими ходимларининг хатти-ҳаракатлари устидан норозилик билдирган.
«Қонунчилигимизда аноним мурожаатлар кўриб чиқилмаслиги белгиланган. Бироқ аноним мурожаатлар коррупция ёки манфаатлар тўқнашувини фош қилишга қаратилган бўлса-чи? Агентлик ушбу мурожаатларни кўриб чиқмоқдами?», — деган саволни ўртага қўйган Танзила Норбоева.
Коррупцияга қарши курашиш Миллий кенгаши раиси уч ой муддатда Коррупцияга қарши курашиш агентлиги Адлия вазирлиги билан биргаликда ушбу масалани пухта ўрганиб, зарур бўлса «Жисмоний ва юридик шахсларнинг мурожаатлари тўғрисида»ги қонунга ўзгартириш киритиш бўйича таклифлар ишлаб чиқиш вазифасини берган.
Аввалроқ Ўзбекистонда 2020 йилда коррупция ҳолатлари бўйича 2270 кишига нисбатан жиноий иш очилгани тўғрисида хабар берилганди.
Изоҳ (0)