Mozambikning shimoli-sharqida joylashgan Palma shahriga qurollangan jangarilar hujum qildi. Eng kamida 57 kishi halok bo‘ldi, ular orasida chet el fuqarolari ham bor, deb yozmoqda “Korrespondent.net”.
Foto: EPA
Palma shahriga 24-mart kuni ekstremistik guruh jangarilari tomonidan hujum qilingan va egallab olingan. Qurollangan terrorchilar harbiy kazarmalar va hukumat binosiga hujum qilgan.
“Yetti nafar chet el fuqarosi halok bo‘ldi... Mening hisob-kitoblarimga ko‘ra, jami 57 kishi qurbon bo‘ldi, lekin ularning soni 60 nafar ekani haqida xabarlar ham bor”, — dedi inson huquqlari himoyachisi Juliya Vachave.
Aksariyat mahalliy aholi yaqin atrofdagi o‘rmonga berkinishga ulgurgan. Taxminan, ikki ming nafar mehnat muhojiri qamal qilingan shahardan qochishning uddasidan chiqqan.
Fransiyaning Total energetika kompaniyasi shahar yaqinida gazni qayta ishlash va suyultirish majmuasini qurayotgan edi. Hujumdan so‘ng kompaniya qurilish ishlari to‘xtatilganini e’lon qildi.
Avvalroq Malining shimolida jangarilar harbiy bazalardan biriga hujum qildi. Oqibatda 33 nafar harbiy halok bo‘lgani haqida xabar berildi. Mamlakat Mudofaa vazirligining ma’lumotlariga ko‘ra, 15-mart kuni Ansango tumanidan 60 kilometr uzoqlikda joylashgan Tessit aholi punktidagi harbiy qismga qurollangan terrorchilar hujum qildi.
Shuningdek, Efiopiyaning Sharqiy Vellega provinsiyasi Oromiya hududida qurollangan odamlar Efiopiya pravoslav cherkoviga hujum qildi. Hujum oqibatida 30 ga yaqin odam halok bo‘ldi. Jangarilar cherkov ruhoniysini o‘ldirib, odamlarni o‘g‘irlab ketgan. Jangarilar changalidan qochib qutulganlar hujumchilarni Oromo ozodlik frontining jangovar qanoti — Oromo Ozodlik armiyasining a’zolari edi, deb da’vo qilmoqda. Tashkilot Efiopiyaning ushbu hududi mustaqilligini qo‘lga kiritishga intilib keladi.
Nigeriyaning Zamfara shtatida esa qurollangan jangarilar maktabga hujum uyushtirib, 317 nafar o‘quvchi qizni o‘g‘irlab ketdi. Muso Mustafo ismli mahalliy aholi vakili jinoyatchilarning maktab yaqinidagi harbiy lager va nazorat-o‘tkazish punktiga ham hujum uyshtirganini aytgan. Qayd etilishicha, qo‘poruvchilar harbiylarning o‘z hujumiga xalaqit qilishini istamagan.
Keyinchalik Nigeriyada o‘g‘irlab ketilgan o‘quvchi qizlar to‘rt kundan so‘ng qutqarildi. Bolalarning qaytishi to‘g‘risida viloyat hukumati vakili Yusuf Idris e’lon qildi. Ammo u o‘quvchi qizlarning aynan qanday qutqarilgani va ular uchun to‘lov to‘lash kerakmi yoki yo‘qligini aytmadi. Qizlarning barchasi sog‘-salomat qaytib keldi.
