Olimlar Islandiyadagi Fagradalsfyadl vulqonining hali sovib ulgurmagan lavasida xot-dog uchun sossikalar pishirdi, deb yozadi Meduza.
Olti ming yildan ortiq vaqt davomida uxlab yotgan vulqon, aftidan, islandiyalik tadqiqotchilar uni ulkan grilga aylantirishi uchun uyg‘ongan ko‘rinadi.
Ta’kidlanishicha, Fagradalsfyadlda bulochkalarni ham pishirsa bo‘ladi: faqat lava ustiga folga qo‘yishga to‘g‘ri kelgan. “Olimlar dam olish maksimal qulay bo‘lishi uchun o‘zlari bilan ketchup ham olib kelgan”, — deyiladi xabarda.
Eslatib o‘tamiz, Islandiyaning janubi-g‘arbiy qismidagi Reykyanes yarimorolida joylashgan Fagradalsfyadl vulqoni 19-mart kuni otilgan. Vulqon mamlakat poytaxti Reykyavikdan taxminan 30 kilometr uzoqlikda joylashgan.
Vulqon sodir bo‘lgan joyda uzunligi 500 dan 700 metrgacha bo‘lgan yoriq hosil bo‘lgan, undan chiqqan lavalar 100 metrgacha balandlikka ko‘tarilgan. Tabiiy hodisaning dastlabki soatlarida lava bir kvadrat kilometrdan ortiq maydonga (200 ga yaqin futbol maydoniga teng) to‘kilgan.
Izoh (0)