Tashqi mehnat migratsiyasi agentligi Qozog‘istonda pasport va oylik maoshlari berilmayotgan o‘zbekistonlik mehnat migrantlarining muammolarini o‘rganishni boshladi. Bu haqda agentlik matbuot xizmati xabar berdi.
Ma’lum qilinishicha, Qozog‘istonning Nur-Sulton, Olmaota va Chimkent shaharlarida vaqtinchalik mehnat faoliyatini amalga oshirayotgan O‘zbekiston fuqarolarining pasport va oylik maoshlari ish beruvchilar tomonidan berilmayotgani haqida ko‘plab murojaatlar kelib tushgan.
Xabarga ko‘ra, mazkur murojaatlar yuzasidan O‘zbekistonning Qozog‘istondagi elchixonasi, Attashe hamda Qozog‘iston ichki ishlar organlari xodimlari bilan hamkorlikda voqea joyiga chiqilib, fuqarolarning qonuniy huquq va manfaatlari himoya qilinmoqda.
“Turli muammolarga duch kelayotgan mehnat migrantlaridan kelib tushgan murojaatlar ijrosi qisqa muddatda ijobiy hal etilmoqda”, — deyiladi xabarda.
Avvalroq Shavkat Mirziyoyevning 25-fevraldagi qarori bilan O‘zbekiston va Qozog‘iston hukumatlari o‘rtasida mehnat faoliyati va Qozog‘istonda O‘zbekiston fuqarosi bo‘lgan mehnat muhojirlari va O‘zbekistonda Qozog‘iston fuqarosi bo‘lgan mehnat muhojirlari huquqlarini himoya qilish to‘g‘risidagi bitim tasdiqlangani haqida xabar berilgan edi.
Izoh (0)