Xitoy hukumati Yevropa Ittifoqining 10 nafar parlamentariy, olim va siyosatchisiga nisbatan, shuningdek, to‘rtta yuridik shaxsga Shinjon-Uyg‘ur muxtor hududidagi ichki siyosatga aralashuvlar sabab sanksiya qo‘lladi. Bu haqda Xitoy TIV bayonotiga tayanib “TASS” xabar berdi.
Foto: AP Photo
Ro‘yxatga Yevroparlamentning besh nafar deputati — Raynxard Byutikofer, Mixael Galer, Rafael Glyuksmann, Ilhan Kuchyuk, Miriam Leksman, shuningdek, Niderlandiya parlamentariysi Syord Vimer Syordsma, Belgiya parlamenti a’zosi Samyuel Kogolati, Litva seymi a’zosi Dovile Shakalene, nemis olimi Adrian Sents va shvetsiyalik tadqiqotchi Byorn Yerden kiritilgan.
“Mazkur shaxslar va ularning oila a’zolariga Xitoy, Gonkong va Makao hududiga kirish taqiqlanadi. Shuningdek, ularga taalluqli kompaniyalar, institutlarga ham Xitoy bilan aloqalar cheklab qo‘yilgan”, — deyilgan TIV hujjatida.
Sanksiyalar ro‘yxatiga YeI Siyosat va xavfsizlik masalalari qo‘mitasi, Inson huquqlar bo‘yicha Yevroparlament, Xitoyni o‘rganish bo‘yicha Berlindagi Merkator instituti (MERICS), shu bilan birga Daniyaning “Demokratiya alyansi” notijorat jamg‘armasi (Alliance of Democracies Foundation) ham kirgan.
Xitoy TIV bayonotida mazkur sanksiyalarning Yevropa Ittifoqining cheklovlariga javob tariqasida qo‘llanilgani qayd etilgan.
“Yevropa Ittifoqining mazkur harakatida yolg‘on va asossiz ma’lumotlarga tayanilgan, YeI haqiqatni inkor etadi va unga hurmat bilan munosabatda bo‘lmagan. Bu xalqaro huquq va xalqaro munosabatlar asosiy normalarining qo‘pol ravishda buzilishi Yevroittifoq va Xitoy o‘rtasidagi aloqalarga putur yetkazmoqda. Xitoy mazkur choralarga e’tirozini bildiradi va sanksiyalarni qoralaydi”, — deyilgan hujjatda.
“Xitoy Yevroittifoqni bu kabi harakatlar borasida sermushohada bo‘lish, qilmishlar oqibatini o‘ylash, xatolarni to‘g‘irlash va inson huquqlari borasida notalar berishni to‘xtatish, ikkiyuzlamachilik asosida shakllangan yolg‘on standratlar qabul qilmaslik va boshqa mamlakatlarning ichki ishlariga aralashmaslikka, shuningdek, noto‘g‘ri yo‘ldan qaytishga chaqiradi. Aks holda Xitoy kelajakda yanada keskin choralar qo‘llashi mumkin”, — deyiladi Xitoy TIV bayonotida.
Mavzuga doir: AQSh va Xitoy bir-birini qonunbuzarlikda ayblamoqda
Avval Yevropa Ittifoqiga a’zo 27 ta mamlakatning tashqi ishlar vazirlari Rossiya va Xitoyning 11 nafar jismoniy shaxsiga nisbatan sanksiyalar qo‘llashni tasdiqlagandi. Bu Yevropa Ittifoqining 1989-yildagi qurol-aslaha embargosidan keyin Pekinga qarshi birinchi sanksiyalari hisoblanadi.
Shuningdek, Yevropa Ittifoqi Myanmadagi vaziyat uchun javobgar bo‘lgan 11 kishiga qarshi sanksiyalar e’lon qilishi haqida ham xabar berilgan.
