“So‘g‘diyona” — “Turon” uchrashuvi hakami nomuayyan muddatga chetlatildi. Islom Ismoilovning o‘yindan keyingi fikrlari tartib-intizom qo‘mitasida ko‘rib chiqiladi

Superliga 2-turidan o‘rin olgan “So‘g‘diyona” — “Turon” o‘yinidagi (1:0) hakamlik O‘FA ekspertlari tomonidan o‘rganib chiqildi, deya xabar qilmoqda PFL bosh direktori vazifasini bajaruvchi Diyor Imomxo‘jayev.

Ekspertlar bellashuv natijasiga ta’sir ko‘rsatgan ikkita holatni aniqlagan:

• hakam 29-daqiqada “So‘g‘diyona” darvozasiga penalti belgilashi kerak edi, ammo bunga jur’at etmadi;
• hakam 52-daqiqada “Turon” darvozasiga yo‘q joydan penalti belgiladi.

Ishni maxsus inspeksiya qabul qilib olgan. O‘rganishlar natijasida inspeksiya ishni Etika qo‘mitasiga oshiradi yoki hakamlik bo‘yicha ekspertlarga qayta taqdim etadi. Bunda barchasi hakam qarorlari qasddan qilingani yoki yo‘qligiga bog‘liq bo‘ladi.

Imomxo‘jayevning ma’lum qilishicha, “Turon” bosh murabbiy Islom Ismoilovning o‘yindan keyingi keskin fikrlari yuzasidan tartib-intizom yig‘ilishi bo‘lib o‘tadi.