“Qani ularning keyingi faoliyati?” – Tanzila Norboyeva “Zulfiya”chilar va turli davlat mukofotini olgan xotin-qizlar haqida

Senat raisi Tanzila Norboyeva Respublika xotin-qizlar jamoatchilik kengashining 15-mart, dushanba kuni o‘tkazilgan birinchi yig‘ilishida “Zulfiya”chilar va boshqa turli mukofotlarni qo‘lga kiritgan ayollarning keyingi faoliyatidan qoniqmayotganini qayd etdi, deya xabar bermoqda “Daryo” muxbiri Mirolim Isajonov.

Respublika xotin-qizlar jamoatchilik kengashi raisi Tanzila Norboyevaning ta’kidlashicha, davlat mukofotini qo‘lga kiritgan xotin-qizlar o‘z hududlarida ayollar muammolarini hal qilishda samarali faoliyat olib borishmayapti.

“Men hayron qolaman-da, davlat mukofotini olish kerak bo‘lsa, talabgorlar ko‘payib ketadi. Joriy yil 8-mart arafasida 121 nafar xotin-qizga turli mukofotlar berildi. Qani keyin o‘sha ayollar? ‘Zulfiya’ni har yili bir viloyatdan 2 nafardan nomzod oladi. Keyin qani ular? Nega mana shunaqa ishlarga yordam berishmaydi? Xotin-qizlar masalalari bo‘yicha ishlayotgan hokim maslahatchilari, qani o‘sha ayollar? Nima uchun ular shunday og‘ir masalalar bo‘yicha ishlashmayapti? Buni sizlarga nisbatan juda qattiq e’tiroz deb tushuninglar.

Viloyat, tumanlarda shunaqa muammoli xotin-qizlar bo‘ladigan bo‘lsa, bundan xulosa chiqarishinglar kerak. Ishni to‘g‘ri tashkillashtira olmagansiz, muvofiqlashtirmagansizlar, umuman natija berolmagansizlar, degan bahoni qo‘yamiz. Sizlar hozir bizga indamayapti, davlat rahbari e’tiroz qilmayapti, deb bemalol yuribsizlar. Unaqa bo‘lmaydi endi!

Hamma faol ayollar, davlat mukofotini olgan ayollarni yig‘inglar. ‘Zulfiya’chi qizlar bor, har yili yo‘q bo‘lib ketyapti. Oladi, yo‘q bo‘ladi, oladi, yo‘q bo‘ladi, qum ichiga singib ketadi. Ishlatinglar-da o‘shalarni. Davlat mukofotiga tavsiya qilinayotganda oylik olmasdan ham, jamoatchilik asosida u ishni qildim, bu ishni qildim, deb yozib beriladi-ku tavsiyanomasida. Qani ularning keyingi faoliyati? Menimcha, davlat mukofotiga muyassar bo‘lganlarning faolligi o‘n karra oshishi kerak. Ular shundan keyin yo‘q bo‘lib ketadi. Sizlar nega o‘sha ayollarni yig‘ib, ozgina gapirmaysizlar? Sizlar ularni yo‘naltirib, rag‘batlantirmaysizlar, sizlar qo‘llab-quvvatlamaysizlar. Shu bois u ayollar o‘zidan o‘zi borib, men shu ishni qilib beray, demaydi.

Keyin davlat mukofotiga tavsiya qilishda natijali ayollarni tavsiya qilishlaringiz kerak. Biror ishni qilib qo‘ygan ayollarni tavsiya etinglar. Shunchaki, tanish-bilishchilik yoki chiroyli ko‘rinishi uchun davlat mukofoti berilmaydi”, — dedi Norboyeva.