Samarqand tumanining “Bo‘zi” mahallasi raisi “Shisha” qabristonidagi kesilgan daraxtlar orqali o‘simlik dunyosiga 128 million 745 ming so‘m zarar yetkazgani ma’lum bo‘ldi. Bu haqda “Daryo”ga viloyat ekologiya va atrof-muhitni muhofaza qilish boshqarmasi axborot xizmati xabar berdi.
Ma’lum qilinishicha, “Shisha” qabristonidagi daraxtlarning kesilishi yuzasidan Samarqand tumani Ekologiya va atrof-muhitni muhofaza qilish inspeksiyasi nazorat inspektorlari tomonidan o‘rganish ishlari olib borilib, natija tuman prokuraturasiga taqdim qilingan.
“O‘rmon fondiga kirmaydigan daraxt va butalar noqonuniy kesilganligi uchun mansabdor shaxslarga jami hisoblangan 25 million 749 ming so‘m zararning besh barobari miqdorida, ya’ni 128 million 745 ming so‘m jarima qo‘llanilmoqda”, — deyiladi boshqarma axborot xizmati taqdim etgan ma’lumotda.
Eslatib o‘tamiz, avvalroq Samarqandda mahalla raisi qishloq qabristonidagi daraxtlarni kestirib tashlagani, fuqarolar esa bundan noroziligi ma’lum qilingandi.
Izoh (0)