Дунё бўйлаб минглаб одамлар Кембриж университетининг Ботаника боғида очилган селеницереус гулини томоша қилди, у фақат бир кеча яшайди, холос, деб ёзади BBC.
Ботаника боғбонларининг айтишича, ватани минглаб километр узоқликда бўлган кактус Британияда илк марта гул очган. Селеницереус – «ой кактуси» ёки «тун маликаси» деб номланиб, дарахтлар атрофида ўсадиган узун бўйли ҳамда текис пояли кактусдир. Тожга ўхшаш ўткир оқ баргли гул одатда тунда гуллаб, атрофга кучли ҳид таратади. У атиги 12 соат давомида гуллайди ва шундан сўнг унинг ҳиди ўзгариб, гули қурийди. Англияда «тун маликаси»нинг очилишини дунё бўйлаб минглаб одамлар томоша қилди.
Кембриж университетидаги иссиқхона раҳбари Алекс Саммерс ҳам бошқалар қатори гулнинг очилишини томоша қилган ва буни ақл бовар қилмас воқеа деб атаган. «Ушбу ғайриоддий гулларни кўрганимдан жуда хурсандман. Бу каби ўсимлик бизнинг коллекциямизда кам учрайди. Билишимча, ‘тун маликаси’ Британияда биринчи марта гуллади», − дея маълум қилган Саммерс Ботаника боғи сайтида.
Кактус ноябрь ойида куртак ёза бошлаган, аммо 2021 йилнинг 19 февраль куни гуллаган. Ўсимлик ёнидаги махсус камера сўнгги 11 кун ичида куртакнинг ҳолатини қайд этган.
Кактус яқинида бўлган иссиқхона ходимлари унинг ўзига хос ҳидидан баҳраманд бўлган. Тўғри, бу узоқ давом этмаган. Дастлаб унинг ҳиди жуда хушбўй бўлган, аммо тонгда ифор кескин ўзгариб кетган.
Селеницереус − кактуслар оиласига мансуб бўлиб, ўсимлик Жанубий ва Марказий Американинг ўрмонларида кенг тарқалган. Одатда ердан уч метр баландроқ бўлган гулнинг нозик барглари узунлиги 28, кенглиги 15 сантиметрни ташкил этади. Гул очилиб, чанглангандан сўнг аста-секин сўлади ва ёқимсиз ҳид пайдо бўлади.
«У бизнинг тропик боғимиздаги сув каштанига ёпиштирилган эди, ўшандан бери дарахт бўйлаб ўсиб чиқди ва поялардан бирида куртак пайдо бўлди», − дейди Саммерс.
https://www.instagram.com/p/CLjZSCKpweY/?utm_source=ig_embed
«Тун маликаси» очилишига бағишланган махсус саҳифани 200 мингдан зиёд одам томоша қилган, улар орасида Австралия, Финляндия ва Таиланд аҳолиси ҳам бор. Кактус куртаклари мезбон ўсимликка ёпишади ва унинг оппоқ гуллари қоронғида гуллайди. «Одамлар буни бошидан охиригача томоша қилди, − дейди мутахассис. – Умид қиламизки, у яна кўп йиллар давомида мунтазам равишда гуллаб, яшнайди».
Изоҳ (0)