Yashnobodda mardikorlik bilan shug‘ullanuvchi shaxs o‘zini IIB xodimi sifatida tanishtirgan mast fuqaroni kaltaklab, o‘ldirib qo‘ydi

Toshkent shahri Yashnobod tumanida spirtli ichimliklar ta’siridagi shaxs tanishini kaltaklab, o‘ldirib qo‘ydi, deya xabar bermoqda Tergov departamenti.

Qayd etilishicha, 18-fevral, payshanba kuni soat 19:30 larda 23 yoshli A.X. Yashnobod tumani “Katta Qo‘yliq” MFYda joylashgan “Raimjon ota” kafesida tanishi 28 yoshli B.M. bilan birgalikda spirtli ichimlik iste’mol qilgan.

Suhbatlari davomida B.M. o‘zini “Milliy gvardiya va IIB xodimiman” deb, A.X.ni shaxsiyatiga teguvchi so‘zlar bilan haqorat qilgan. A.X.da “senlar meni 10 sutkaga qamagansizlar” deya unga nafrati uyg‘onib, shu kuni soat 01:00 larda B.M.ni “Katta Qo‘yliq” MFY hududidagi yerosti yo‘lagiga olib borgan.

U yerda B.M. tanasining turli joylariga oyoq va qo‘llari bilan tan jarohati yetkazib, hodisa joyidan yashiringan.

Natijada B.M. olgan tan jarohatlari oqibatida hodisa joyida vafot etgan.

Mazkur holat yuzasidan A.X.ga nisbatan Jinoyat kodeksining 104-moddasi 3-qismi “d” bandi (odam o‘limiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.

Olib borilgan tergov harakatlari davomida marhum B.M. Milliy gvardiya xodimi emasligi, 2-guruh nogironi bo‘lib, hech qayerda ishlamasligi, A.X. esa mardikorlik bilan shug‘ullanib, bir necha marotaba ma’muriy huquqbuzarlik sodir etganligi tufayli unga nisbatan 10 sutka qamoq jazosi qo‘llanilganligi ma’lum bo‘lgan.

Hozirda tergov harakatlari davom etmoqda.

Bundan avval Surxondaryoda pochchasi va ikki nafar qarindoshiga pichoq urgan shaxsga jinoyat ishi qo‘zg‘atilgani, Jizzaxda mast erkak ayoli va singlisini haqorat qilgan do‘stini tayoq bilan urib, o‘ldirib qo‘ygani hamda Qashqadaryoda mast o‘g‘il ko‘chaga chiqishiga ruxsat bermagan otasini pichoqlab o‘ldirgani haqida xabar berilgandi.