Тошкент шаҳри Яшнобод туманида спиртли ичимликлар таъсиридаги шахс танишини калтаклаб, ўлдириб қўйди, дея хабар бермоқда Тергов департаменти.
Қайд этилишича, 18 февраль, пайшанба куни соат 19:30 ларда 23 ёшли А.Х. Яшнобод тумани «Катта Қўйлиқ» МФЙда жойлашган «Раимжон ота» кафесида таниши 28 ёшли Б.М. билан биргаликда спиртли ичимлик истеъмол қилган.
Суҳбатлари давомида Б.М. ўзини «Миллий гвардия ва ИИБ ходимиман» деб, А.Х.ни шахсиятига тегувчи сўзлар билан ҳақорат қилган. А.Х.да «сенлар мени 10 суткага қамагансизлар» дея унга нафрати уйғониб, шу куни соат 01:00 ларда Б.М.ни «Катта Қўйлиқ» МФЙ ҳудудидаги ерости йўлагига олиб борган.
У ерда Б.М. танасининг турли жойларига оёқ ва қўллари билан тан жароҳати етказиб, ҳодиса жойидан яширинган.
Натижада Б.М. олган тан жароҳатлари оқибатида ҳодиса жойида вафот этган.
Мазкур ҳолат юзасидан А.Х.га нисбатан Жиноят кодексининг 104-моддаси 3-қисми «д» банди (одам ўлимига сабаб бўлган қасддан баданга оғир шикаст етказиш) билан жиноят иши қўзғатилиб, қамоққа олиш тарзидаги эҳтиёт чораси қўлланилган.
Олиб борилган тергов ҳаракатлари давомида марҳум Б.М. Миллий гвардия ходими эмаслиги, 2-гуруҳ ногирони бўлиб, ҳеч қаерда ишламаслиги, А.Х. эса мардикорлик билан шуғулланиб, бир неча маротаба маъмурий ҳуқуқбузарлик содир этганлиги туфайли унга нисбатан 10 сутка қамоқ жазоси қўлланилганлиги маълум бўлган.
Ҳозирда тергов ҳаракатлари давом этмоқда.
Бундан аввал Сурхондарёда поччаси ва икки нафар қариндошига пичоқ урган шахсга жиноят иши қўзғатилгани, Жиззахда маст эркак аёли ва синглисини ҳақорат қилган дўстини таёқ билан уриб, ўлдириб қўйгани ҳамда Қашқадарёда маст ўғил кўчага чиқишига рухсат бермаган отасини пичоқлаб ўлдиргани ҳақида хабар берилганди.
Изоҳ (0)