O‘zbekistonda “naqdlashtiruvchi korxonalar” bilan kurashish boshlanib, 396 ta korxonadan iborat shubhali kontragentlar reyestri tuzilgani haqida xabar berilgan edi.
Ushbu xo‘jalik yurituvchi subyektlar o‘z faoliyati davomida qalbaki operatsiyalarni amalga oshirib, budjetga to‘lanadigan soliq summalarini kamaytirgan. 10 mingga yaqin korxona ular bilan moliyaviy operatsiyalarni amalga oshirib, qariyb 1 trillion so‘m miqdoridagi qo‘shilgan qiymat solig‘i summasini hisob (zachyot)ga olgan holda budjetga to‘lamagan.
Davlat soliq qo‘mitasi (DSQ) matbuot xizmatining ma’lum qilishicha, bunday kontragentlar orasida 120 ta davlat korxonasi (47,3 milliard so‘m) va 86 ta davlat ulushi mavjud (48,1 milliard so‘m) korxona aniqlandi.
Xususan, “O‘zbekiston temir yo‘llari” AJ “shubhali” kompaniyalardan 18,8 milliard so‘m mahsulot xarid qilgan, “Qizilqumsement” AJ — 6,9 milliard so‘m, “O‘zbekiston metallurgiya kombinati” AJ — 5 milliard so‘mdan ortiq, “O‘zbekiston milliy elektr tarmoqlari” AJ — 2, 5 milliard so‘m, “Bekobodsement” — 1,1 milliard so‘m, “O‘zbekneftgaz” AJ — 720 million so‘m, “Ipak yo‘li” AT banki — 642,1 million so‘m, “Trastbank” — 580 million so‘m, “Turonbank” — 173 million so‘m, “Chilonzor buyum savdo kompleksi” (“Ippodrom”) 119,2 million so‘mlik mahsulot xarid qilgan.
Eslatib o‘tamiz, Davlat soliq xizmati organlari tomonidan soliq to‘lovchilarning murojaatlari asosida faoliyati shubhali deb topilgan korxonalar bilan amalga oshirilgan bitimlarni o‘rganib chiqish uchun tezkor ravishda kameral soliq tekshiruvlari tashkil etilmoqda.
23-fevral holatiga ko‘ra, respublika bo‘yicha jami 3306 ta korxonada 554,6 milliard so‘mlik asossiz hisobga olingan qo‘shilgan qiymat solig‘i (QQS) summalariga aniqlik kiritish bo‘yicha kameral soliq tekshiruvlari yakunlangan. Natijada 3145 ta, ya’ni 95,1 foiz korxonada (514,8 milliard so‘m) soxta operatsiyalarni amalga oshirish faktlari tasdiqlangan.
Izoh (0)