Shuhrat Musayev Namangan viloyati hokimining o‘rinbosari — Mahalla va oilani qo‘llab-quvvatlash boshqarmasi boshlig‘i etib tayinlandi

Namanganda yana bir lavozim o‘zgarishi yuz berdi. Bu haqda “Daryo” muxbiri Azizbek Abduvaliyev xabar bermoqda.

Hozirga qadar Namangan viloyat kasaba uyushmalari tashkilotlari birlashmasi raisi bo‘lib ishlab kelgan Shuhrat Musayev viloyat hokimining o‘rinbosari — Mahalla va oilani qo‘llab-quvvatlash boshqarmasi boshlig‘i etib tayinlandi.

Shuhrat Musayev 1973-yilda Namangan viloyatining Chortoq tumanida tug‘ilgan. Ma’lumoti oliy, 1996-yilda Andijon muhandislik-iqtisodiyot institutini tamomlagan.

Mehnat faoliyatini 1996-yilda Namangan viloyat “Istiqbolstat” bosh boshqarmasi mutaxassisligidan boshlagan.

2000—2017-yillarda viloyat “Iqtisodstat” bosh boshqarmasi bo‘lim boshlig‘i, viloyat Iqtisodiyot bosh boshqarmasining umumiqtisodiyot kompleksini muvofiqlashtirish bo‘limi boshlig‘i, viloyat hokimligi referenti, bosh mutaxassisi, kotibiyat mudiri, axborot-tahlil guruhi rahbari vazifalarida faoliyat yuritgan.

Shuhrat Musayev 2017-yildan buyon viloyat kasaba uyushmalari tashkilotlari birlashmasi raisi lavozimida ishlab kelayotgandi.

Bundan avval “to‘rtligi” lavozimidan ozod qilingan Uychi tumaniga yangi hokim tayinlangani, Toshkent shahar hokimining o‘rinbosari G‘ofur Jamolov Namangan shahri hokimi etib tayinlangani, Xurshid Odilov Namangan shahri prokurori etib tayinlangani haqida xabar berilgandi.