Davlat soliq qo‘mitasi O‘zbekistonda “naqdlashtiruvchi korxonalar” bilan kurashishni boshlagani haqida xabar berilgan edi.
Foto: “Daryo”
Xatarlarni tahlil qilish natijasida aniqlangan 396 ta korxonadan iborat shubhali kontragentlar reyestri tuzilgan, shuningdek, soliqlarni kamroq to‘lash maqsadida pul mablag‘larini naqdlashtirish bilan shug‘ullanuvchi “naqdlashtiruvchi korxonalar” xizmatlaridan foydalangan 10 mingga yaqin tashkilotlar ro‘yxati shakllantirildi.
Davlat budjetga to‘lanmagan qo‘shilgan qiymat solig‘i summasi o‘rnini qoplash maqsadida ushbu 396 ta “shubhali” korxonalar va ularning deyarli 10 mingga yaqin biznes hamkorlarining shaxsiy kabinetlariga inkasso topshiriqnomalari qo‘yilishi bo‘yicha xabarnomalar yuborilgan.
Spot’ning yozishicha, kuni kecha qo‘mita soliq to‘lovchilar uchun 18-fevraldan boshlab qo‘mitada ham, barcha soliq idoralarida ham faoliyat ko‘rsatuvchi ishchi guruhlarini tuzdi. “Naqdlashtiruvchi korxonalar” bilan moliyaviy operatsiyalarni amalga oshirgan tadbirkorlar kameral tekshiruv o‘tkazish bo‘yicha murojaat qilishlari mumkin.
Qo‘mita natijalar to‘g‘risida ijtimoiy tarmoqlar orqali har kuni hisobot bermoqda. Xususan, 17-fevral kuni 17 ta korxonada o‘tkazilgan soliq nazorati tadbirlarining dastlabki natijalariga ko‘ra, 16 ta korxona yoki 94,1 foiz hollarda soxta operatsiyalarni amalga oshirish faktlari tasdiqlangan. 18-fevral kuni esa 14 ta holatdan 12 tasi tasdiqlangan.
Shu bilan birga, murojaatlarning aksariyati hali o‘rganilmoqda va uning natijalari hozircha noma’lum.
