Ўзбекистонда «обнал фирма»лар билан сохта битим тузган давлат корхоналари рўйхати эълон қилинди

Ўзбекистонда «нақдлаштирувчи корхоналар» билан курашиш бошлаганиб, 396 та корхонадан иборат шубҳали контрагентлар реестри тузилгани ҳақида хабар берилган эди.

Ушбу хўжалик юритувчи субъектлар ўз фаолияти давомида қалбаки операцияларни амалга ошириб, бюджетга тўланадиган солиқ суммаларини камайтирган. 10 мингга яқин корхона улар билан молиявий операцияларни амалга ошириб, қарийб 1 триллион сўм миқдоридаги қўшилган қиймат солиғи суммасини ҳисоб (зачёт)га олган ҳолда бюджетга тўламаган.

ДСҚ матбуот хизматининг маълум қилишича, бундай контрагентлар орасида 120 та давлат корхонаси (47,3 миллиард сўм) ва 86 та давлат улуши мавжуд (48,1 миллиард сўм) корхона аниқланди.

Хусусан, «Ўзбекистон темир йўллари» АЖ «шубҳали» компаниялардан 18,8 миллиард сўм маҳсулот харид қилган, «Қизилқумцемент» АЖ — 6,9 миллиард сўм, «Ўзбекистон металлургия комбинати» АЖ — 5 миллиард сўмдан ортиқ, «Ўзбекистон миллий электр тармоқлари» АЖ — 2, 5 миллиард сўм, «Бекободцемент» — 1,1 миллиард сўм, «Ўзбекнефтгаз» АЖ — 720 миллион сўм, «Ипак йўли» АТ банки — 642,1 миллион сўм, «Трастбанк» — 580 миллион сўм, «Туронбанк» — 173 миллион сўм, «Чилонзор буюм савдо комплекси» («Ипподром») — 119,2 миллион сўмлик маҳсулот харид қилган.

Эслатиб ўтамиз, Давлат солиқ хизмати органлари томонидан солиқ тўловчиларнинг мурожаатлари асосида фаолияти шубҳали деб топилган корхоналар билан амалга оширилган битимларни ўрганиб чиқиш учун тезкор равишда камерал солиқ текширувлари ташкил этилмоқда.

23 февраль ҳолатига кўра, республика бўйича жами 3 306 та корхонада 554,6 миллиард сўмлик асоссиз ҳисобга олинган қўшилган қиймат солиғи (ҚҚС) суммаларига аниқлик киритиш бўйича камерал солиқ текширувлари якунланган. Натижада 3145 та, яъни 95,1 фоиз корхонада (514,8 миллиард сўм) сохта операцияларни амалга ошириш фактлари тасдиқланган.