Xitoyda lift va balkonga ega ikki qavatli avtouy sotuvga chiqdi (foto)

SAIC kompaniyasi Maxus V90 kemperlarining alohida Villa Edition versiyasiga buyurtmalar qabul qilishni boshladi. Uning o‘ziga xosligi — oynali devorlarga ega to‘laqonli ikkinchi qavat, kichik balkon va hatto lift borligidir. Xitoy firmasi hashamatli avtouy uchun 413 ming dollar talab qilmoqda, deb yozadi Motor.

G‘ildiraklar ustidagi texnologik uyning pastki qavati siljiydigan seksiyalar bilan jihozlangan bo‘lib, shu sababli uning maydoni 20 kvadrat metrga qadar kattalashgan. Pastki qismida divan, ko‘ngilochar tizimi va shift qismida proyeksion ekran joylashgan. Elektron avtomobilni Touchscreen yoki smartfon, ovoz va hatto imo-ishoralar orqali boshqarsa bo‘ladi.

Shuningdek, birinchi qavatda muzlatkich, plita, rakovinali oshxona, yuvinish xonasi va bir kishiga mo‘ljallangan ixcham lift joylashgan. To‘liq o‘lchamli yotoq joyi bu yerda bitta — u haydovchi kabinasi ostida joylashgan, biroq zarurat tug‘ilganida tungi hordiq uchun birinchi va ikkinchi qavatlardagi divanlardan ham foydalansa bo‘ladi.

Belgilangan joyga yetib kelgan avtouyning massiv tom qismi ko‘tarilib, oyna devorlarga ega 12,4 metrli mehmonxonani ochadi. Quyosh yoki begonalar nigohidan himoyalanish uchun oynalar shaffofligini o‘zgartirish mumkin.

Ikkinchi qavatdagi joyni mijozning xohishiga qarab jihozlasa bo‘ladi: masalan, tushlik zonasi, kabinet yoki choy ichish xonasi. Avtouyning yana bir o‘ziga xosligi — yotoqxona ustida siljiydigan kichik balkonga egaligidir.

Avvalroq Volkswagen kompaniyasi Caddy modelining safarda kerak bo‘ladigan palatkaga ega versiyasini tayyorlagani to‘g‘risida xabar berilgandi.