SAIC компанияси Maxus V90 кемперларининг алоҳида Villa Edition версиясига буюртмалар қабул қилишни бошлади. Унинг ўзига хослиги — ойнали деворларга эга тўлақонли иккинчи қават, кичик балкон ва ҳатто лифт борлигидир. Хитой фирмаси ҳашаматли автоуй учун 413 минг доллар талаб қилмоқда, деб ёзади Motor.
Ғилдираклар устидаги технологик уйнинг пастки қавати силжийдиган секциялар билан жиҳозланган бўлиб, шу сабабли унинг майдони 20 квадрат метрга қадар катталашган. Пастки қисмида диван, кўнгилочар тизими ва шифт қисмида проекцион экран жойлашган. Электрон автомобилни Touchscreen ёки смартфон, овоз ва ҳатто имо-ишоралар орқали бошқарса бўлади.
Шунингдек, биринчи қаватда музлаткич, плита, раковинали ошхона, ювиниш хонаси ва бир кишига мўлжалланган ихчам лифт жойлашган. Тўлиқ ўлчамли ётоқ жойи бу ерда битта — у ҳайдовчи кабинаси остида жойлашган, бироқ зарурат туғилганида тунги ҳордиқ учун биринчи ва иккинчи қаватлардаги диванлардан ҳам фойдаланса бўлади.
Белгиланган жойга етиб келган автоуйнинг массив том қисми кўтарилиб, ойна деворларга эга 12,4 метрли меҳмонхонани очади. Қуёш ёки бегоналар нигоҳидан ҳимояланиш учун ойналар шаффофлигини ўзгартириш мумкин.
Иккинчи қаватдаги жойни мижознинг хоҳишига қараб жиҳозласа бўлади: масалан, тушлик зонаси, кабинет ёки чой ичиш хонаси. Автоуйнинг яна бир ўзига хослиги — ётоқхона устида силжийдиган кичик балконга эгалигидир.
Аввалроқ Volkswagen компанияси Caddy моделининг сафарда керак бўладиган палаткага эга версиясини тайёрлагани тўғрисида хабар берилганди.
Изоҳ (0)