AQShda noodatiy transport vositasi sotuvga qo‘yildi — u xuddi avtomobillardagi orqani ko‘rishga mo‘ljallangan oynaga o‘xshaydi. Ford Consumer Car nomi ostidagi g‘ayrioddiy konsept-karni michiganlik dizayner yaratgan. Hozirga o‘ziga yangi xo‘jayin qidirayotgan mazkur mashina 49,9 ming dollarga baholanmoqda, deb xabar beradi Motor.
Garage Kept Motors dilerlik markazining saytida yozilishicha, old tomoniga ulkan ko‘zgu o‘rnatilgan trapetsiyasimon mashinaning asosini 1993-yilda ishlab chiqarilgan Ford Festiva tashkil etadi. Avtomobil 2016-yilda transformatsiya qilingan, 2019- va 2020-yillarda esa Kaliforniyadagi Peterson avtomobil muzeyidagi ekspozitsiyaning bir qismi bo‘lgan.
Dizaynerning maqsadi mashinani imkoni boricha nafaqat noodatiy, balki minimalistik holatga keltirish bo‘lgan. Old tomonidagi radiator panjarasini ko‘zgu paneli egallagan bo‘lib, uning ortida uch qator diod faralar yashiringan. Konseptning oyna va eshiklari yo‘q: kirish yon tomonlaridagi teshiklardan ochiluvchi to‘rtta zinadan amalga oshiriladi.
Quyruq qismiga yagona fonar joylashtirilgan bo‘lib, u metalldan ishlangan teshikli gorizontal panel ortiga yashiringan. Kuzovning asosiy qismi mato bilan qoplangan. Qiziqarli jihati, rodsterning salonida orqani ko‘rishga mo‘ljallangan to‘laqonli ko‘zgu yo‘q — faqat haydovchi tomonida mitti ko‘zgu joylashgan. Shuningdek, multimedia, audio tizimlari va hatto qurilmalar paneli ham yo‘q.
Dilerning ma’lum qilishicha, bazaviy jihozlanishsiz bo‘lgan avtomobil umumiy foydalanishdagi yo‘llarda harakatlana oladi, biroq shlem va himoya ko‘zoynaklarini taqib olish majburiy. Rodster Ford’ning 1,3 litrli “to‘rtligi” yordamida harakatga keladi, u esa o‘z navbatida besh pog‘onali mexanik uzatmalar qutisi yordamida boshqariladi.
Eslatib o‘tamiz, 2020-yilning aprelida AQShda haydovchisiz boshqariladigan televizorga o‘xshash g‘ayrioddiy mashina patentlangani to‘g‘risida xabar berilgandi.
Mavzuga doir:
Izoh (0)