O‘zbekistonda 1-iyuldan boshlab ichki aviaparvozlar uchun ro‘yxatdan o‘tishda shaxsni tasdiqlovchi hujjatlarning elektron variantidan foydalanish mumkin bo‘ldi.
Uzbekistan Airports matbuot xizmatining ma’lum qilishicha, aeroportda ro‘yxatdan o‘tishdan oldin yo‘lovchi Yagona portal sayti/mobil ilovasi yoki “Ijtimoiy karta” mobil ilovasidagi shaxsiy kabinetiga kirib, shaxsiy ma’lumotlar sahifasiga o‘tadi va elektron shaklda shaxsni tasdiqlovchi hujjatlarni ro‘yxatdan o‘tish joyidagi xodimga ko‘rsatadi.
Faqat Yagona portal sayti/mobil ilovasi yoki “Ijtimoiy karta” mobil ilovasidagi joriy ma’lumotlar shaxsni tasdiqlovchi hujjat sifatida qabul qilinadi. Shuning uchun ro‘yxatdan o‘tish paytida shu kabi hujjatlarning nusxalari, fotosuratlari, pasport/IDʼning skanerlangan variantlari yoki shaxsiy ma’lumotlar bo‘lgan veb-sayt sahifasining skrinshotlari qabul qilinmaydi.
2024-yilning dekabrida Vazirlar Mahkamasining “Aholini ijtimoiy qo‘llab-quvvatlashda ijtimoiy karta tizimini joriy etish chora-tadbirlari to‘g‘risida”gi qarori qabul qilingandi. Unda 2025-yil 1-iyuldan boshlab banklarda, notarial idoralarda, aeroportlarda ichki reyslarni ro‘yxatdan o‘tkazishda va O‘zbekiston hududidan o‘tuvchi poyezdlarga chiqishda, davlat, korporativ va boshqa xizmatlarni ko‘rsatish, shu jumladan, elektron xizmat ko‘rsatish hamda fuqarolarni qabul qilishda tegishli hujjatlarni taqdim etishni talab qiladigan davlat organlari va boshqa tashkilotlarda bir qator hujjatlarning qog‘oz shakli talab etilmasligi belgilangandi.
Izoh (0)