Amazon kompaniyasi yangi Jeyms Bond obrazini gavdalantiradigan aktyorlarni tanlamoqda. Variety nashrining xabar berishicha, asosiy nomzodlar orasida 28 yoshli Jeykob Elordi (“Eyforiya”, “Pristsilla: Elvis va men”), 29 yoshli Tom Holland (“O‘rgimchak odam”, “Odamlar to‘la xona”) va yana bir britaniyalik 29 yoshli aktyor Harris Dikinson (“Yomon qiz”, “G‘am-alam uchburchagi”) bor.
Foto: “Pravila jizni”
Amazon studiyasi va prodyuserlar aynan 30 yoshgacha bo‘lgan va britaniyalik aktyor izlamoqda, ammo Elordining avstraliyalik ekani bunga to‘sqinlik qilmaydi. Chunki ilgari Bond rolini avstraliyalik Jorj Lezenbi ham ijro etgan.
Avvalroq 007 agenti obrazini 35 yoshli Aaron Teylor-Jonson, 42 yoshli Genri Kavill yoki 52 yoshli Idris Elba gavdalantirishi mumkinligi haqida mish-mishlar tarqalgan edi. Biroq ularning yoshi kattaligi sababli bu ehtimoldan yiroqdir, deb yozadi Variety.
Foto: “Pravila jizni”
Jeyms Bond haqidagi yangi film rejissyori Deni Vilnyov bo‘ladi. Amazon navbatdagi kartinani 2028-yilda taqdim etishni rejalashtirgan.
Vilnyov bolaligidan Bond filmlarining muxlisi bo‘lganini aytib o‘tdi:
“Kinoga oid ilk xotiralarim aynan Jeyms Bond bilan bog‘liq. Men otam bilan birga u haqdagi filmlarni ko‘rib ulg‘ayganman, xususan, Shon Konneri ijrosini hurmat qilaman”, dedi rejissyor va yangi loyiha ustida ishlashni “katta mas’uliyat” va “ulug‘ sharaf” deb atadi.
Yangi film franshizaning 26-qismi bo‘ladi va u 2021-yilda suratga olingan “O‘limga vaqt yo‘q” filmidan keyingi voqealarni aks ettiradi. Unda aktyor Deniel Kreyg 007 agenti obrazini so‘nggi bor ijro etgan. Syujetga ko‘ra, uning qahramoni film oxirida dushmanlarga tegishli zavod portlashi natijasida halok bo‘ladi.
Foto: “Pravila jizni”
Ma’lumot uchun, 2024-yil fevral oyida Amazon MGM Jeyms Bond franshizasi boshqaruvini qo‘lga kiritgan. Kompaniya bu borada Bond filmlarini 1960-yillardan buyon prodyuserlik qilib kelayotgan Barbara Brokkoli va Maykl Uilson bilan kelishuv imzolagan.
Izoh (0)