Qurilish vazirligi Toshkent viloyatidagi tasdiqlanmagan va ekspertiza organlarining ijobiy xulosasi olinmagan loyiha hujjatlarisiz, qurilish-montaj ishlarini boshlash yuzasidan vakolatli organni xabardor qilmasdan, qurilish ishlari amalga oshirilgan obyektlarga oid ma’lumotlar bilan bo‘lishdi.
Xususan, ma’lum qilinishicha, Bo‘stonliq tumani “Do‘stlik” MFY hududida amalga oshirilayotgan monitoringlar jarayonida “Energo texnika grant” MChJ tomonidan tegishli shaharsozlik hujjatlarini rasmiylashtirmasdan Vazirlar Mahkamasining 2019-yil 28-noyabrdagi 961-sonli qarorlari talabini buzib, hududiy inspeksiyani xabardor qilmasdan, uchta 4 qavatli turar joy binolarida o‘zboshimchalik bilan qurilish-montaj ishlari olib borayotgani aniqlangan. MChJ faoliyatida qisqa muddatli tekshirish o‘tkazish to‘g‘risida Toshkent viloyati qurilish sohasida nazorat inspeksiyaning 2020-yil 23-dekabrdagi 279-sonli buyrug‘i asosida 1 kunlik tekshirish o‘tkazilgan.
Qisqa muddatli tekshirish natijasiga ko‘ra, ishga oid bo‘lgan barcha hujjatlar o‘rnatilgan tartibda rasmiylashtirilgan va huquqbuzarlikka yo‘l qo‘ygan mas’ul shaxsga nisbatan ma’muriy bayonnoma tuzilib, huquqbuzardan tushuntirish xati va tilxat olinib, qonunchilikda belgilangan tartibda chora ko‘rish yuzasidan Jinoyat ishlari bo‘yicha Bo‘stonliq tuman sudiga hujjatlar to‘plami taqdim qilingan.
Firma Ma’muriy javobgarlik to‘g‘risidagi kodeksning 99-moddasi 7-qismi bilan javobgarlikka tortilgan. Tegishli chora ko‘rilganidan keyin ham “Energo texnika grant” MChJ tomonidan qurilish-montaj ishlari to‘xtatilmagan hamda belgilangan tartibda inspeksiyadan ro‘yxatdan o‘tish uchun tegishli hujjatlar rasmiylashtirilmagan.
Shuningdek, Quyi Chirchiq tumani “Oydinobod” MFY hududida amalga oshirilgan monitoringlar jarayonida “Rus Bek” MChJ tomonidan tegishli shaharsozlik hujjatlarini rasmiylashtirmasdan, hududiy inspeksiyani xabardor qilmasdan savdo va maishiy xizmat ko‘rsatish kompleksida qurilish-montaj ishlari olib borilayotganligi aniqlangan.
Ruxsat hujjatlari mavjudligi va shaharsozlik me’yorlari hamda qoidalariga rioya qilinishi yuzasidan qisqa muddatli tekshirish olib borilib, aniqlangan huquqbuzarliklarni bartaraf etish bo‘yicha xo‘jalik yurituvchi subyektning “Rus Bek” MChJ faoliyatida qisqa muddatli tekshirish o‘tkazish to‘g‘risida inspeksiyaning 2020-yil 23-dekabrdagi 278-sonli buyrug‘i asosida 1 kunlik tekshirish o‘tkazilgan.
Unga ko‘ra huquqbuzarlikka yo‘l qo‘ygan mas’ul shaxsga nisbatan ma’muriy bayonnoma tuzilib, huquqbuzardan tushuntirish xati va tilxat olinib, qonunchilikda belgilangan tartibda chora ko‘rish yuzasidan Jinoyat ishlari bo‘yicha Chinoz tuman sudiga hujjatlar to‘plami taqdim qilingan. MChJ tegishli chora ko‘rilganidan keyin ham qurilish-montaj ishlarini to‘xtatmagan hamda belgilangan tartibda inspeksiyadan ro‘yxatdan o‘tish uchun tegishli hujjatlar rasmiylashtirmasdan, qurilish montaj ishlari davom ettirmoqda.
Bundan tashqari, Chinoz tumani “Yallama” MFY hududida amalga oshirilgan monitoringlar jarayonida Euroazia transportion and logistik company MChJ QK tomonidan tegishli shaharsozlik hujjatlarini rasmiylashtirmasdan Vazirlar Mahkamasining 2019-yil 28-noyabrdagi 961-sonli qarorlari talabini buzib, hududiy inspeksiyani xabardor qilmasdan, bojxona terminalining qurilish-montaj ishlari olib borilayotganligi aniqlangan.
MChJ mas’ul shaxsiga nisbatan ma’muriy bayonnoma tuzilgan, huquqbuzardan tushuntirish xati va tilxat olinib, qonunchilikda belgilangan tartibda chora ko‘rish yuzasidan Jinoyat ishlari bo‘yicha Bo‘stonliq tuman sudiga hujjatlar to‘plami taqdim qilingan va Ma’muriy javobgarlik to‘g‘risidagi kodeksning 99-moddasi 7-qismi bilan javobgarlikka tortilgan.
Tegishli chora ko‘rilganidan keyin ham MChJ QK tomonidan qurilish-montaj ishlari to‘xtatilmagan hamda belgilangan tartibda inspeksiyadan ro‘yxatdan o‘tish uchun tegishli hujjatlar rasmiylashtirmasdan, qurilish montaj ishlari davom ettirilmoqda.
“Qurilish vazirligi hamda hududdagi qurilish sohasida nazorat inspeksiyalari tomonidan hamisha noqonuniy va sifatsiz qurilmalar barpo etayotgan shaxslarga nisbatan tegishli choralar ko‘rilgan, ammo bundan o‘ziga kerakli xulosa chiqarmay, mas’uliyatni ham unutib, talabga javob bermaydigan binolarni qurishda davom etishmoqda. Yurtimizning boshqa hududlarida ham bular kabi turar joylar bisyor va biz ular haqida ma’lumot berishda davom etamiz. O‘ylaymizki, xuddi shunday xatoga yo‘l qo‘yib, boshqalarning xavfsizligi haqida unutayotganlar o‘zlariga tegishli xulosa chiqarib olishadi”, — deyiladi xabarda.
Avvalroq Nukusda kamchiligi aniqlangan ko‘p qavatli uyning devori buzib tashlangani, Andijonda noqonuniy ravishda 8 qavatli qurilgan binoning yuqori qavati tadbirkorning o‘z hisobidan buzilayotgani to‘g‘risida xabar berilgandi.
Izoh (0)