Haj-2025 mavsumida ziyoratga borgan o‘zbekistonliklarning 8 nafari Saudiya Arabistonida vafot etgan. Bu haqda “Dunyo” axborot agentligi xabar berdi.
Ma’lum qilinishicha, O‘zbekiston hukumati tomonidan barcha zarur chora-tadbirlar ko‘rilishiga qaramay, bu yilgi haj ibodati paytida kuzatilgan jazirama natijasida va surunkali kasalligi bo‘lgan to‘rt nafar o‘zbekistonlik Saudiya Arabistonida vafot etgan.
Shuningdek, O‘zbekiston musulmonlari idorasining ogohlantirishlariga qaramay, hajga noqonuniy yo‘llar bilan borgan yana to‘rt nafar fuqaro ushbu mamlakatda olamdan o‘tgan.
Bundan tashqari, haj ibodati tugaganidan so‘ng Bosh konsulxonaga 40 nafardan ziyod ziyoratchilar xorijga chiqish pasportlarini yo‘qotgani bois O‘zbekistonga qaytish guvohnomasini rasmiylashtirish uchun murojaat qilgan.
Xabarda aytilishicha, joriy yildagi haj mavsumi davomida O‘zbekistondan 15 mingdan ziyod hojilar haj amallarini tartibli va namunali ado etishlari ta’minlandi. O‘zbekistonlik hojilarning Saudiya Arabistoniga kelishi 13-maydan boshlanib, 30-mayga qadar davom etdi. Hojilarning O‘zbekistonga qaytib ketishi 12-iyundan boshlandi. So‘nggi hojilar 29-iyun kuni havo qatnovlari orqali vatanga qaytdi.
Toshkentning Yakkasaroy tumanidagi Rakat masjidi imom-xatibi Rabbimqul Muhammadiyev ham Madina shahrida vafot etgandi. U 23-may kuni Toshkent—Madina yo‘nalishida Toshkentning 38-guruh ziyoratchilari guruh rahbari sifatida yo‘lga chiqqan. Parvoz davomida uyquga ketgan va shu holatda uyg‘onmagan.
Madina xalqaro aeroporti shifokorlari tomonidan ko‘rilganda ahvoli o‘ta og‘ir, behush bo‘lgan, savollarga javob bermagan. Shundan so‘ng klinikaga joylashtirilgan. Bosh miya qon aylanishi o‘tkir buzilishi, miya o‘zagi strukturalari o‘zgarishlari, bosh miya shishishi tashxisi qo‘yilgan. 24-mayda operatsiya o‘tkazilgan, biroq ahvoli og‘irligicha saqlanib qolgan va 26-mayda vafot etgan.
Izoh (0)