Farg‘ona viloyatining Bag‘dod tumanida “Jiguli” avtomobilining kanalga tushib ketishi oqibatida mashina salonida bo‘lgan bir oilaning uch nafar vakili vafot etdi, deya xabar bermoqda “Daryo” muxbiri.

Ma’lum qilinishicha, 2021-yil 13-fevral kuni soat 13:30 larda Katta Farg‘ona kanalining Bag‘dod tumani, “Ultarma” mahallasi, Jar qishlog‘i hududidan o‘tgan qismida “VAZ-2101” avtomobili suvga tushib ketgan.

Dastlabki surishtiruv natijalariga ko‘ra, Buvayda tumani “Qo‘ng‘irot” mahallasidagi Alimergan qishlog‘ida yashagan, 1992-yilda tug‘ilgan A.U. avtomobil salonida bo‘lgan turmush o‘rtog‘i bilan o‘zaro janjallashib qolgan va jahl ustida mashinasini Katta Farg‘ona kanaliga tushirib yuborgan.

Qayd etilishicha, haydovchi A.U., uning 1998-yilda tug‘ilgan turmush o‘rtog‘i A.M. va 2016-yilda tug‘ilgan qizi A.M.ning jasadlari avtomashina salonidan topilgan.

Surishtiruv jarayonida aniqlanishicha, haydovchi A.U. turmush o‘rtog‘i A.M. bilan 2019-yilning noyabr oyidan buyon oilaviy kelishmovchilik sababli alohida yashab kelgan. 2021-yil 18-yanvar kuni A.U. birga yashash maqsadida turmush o‘rtog‘ini yashash xonadoniga olib kelgan va onasidan kechirim so‘rashini aytgan. Biroq A.M. qaynonasidan kechirim so‘ramasdan, o‘zaro janjallashib, yana o‘z uyiga ketib qolgan.

Mazkur holat yuzasidan Bog‘dod tumani IIB tergov bo‘linmasi tomonidan Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lsa) bilan jinoyat ishi qo‘zg‘atilgan.

Avvalroq Qashqadaryoda Lacetti haydovchisining rulda uxlab qolishi oqibatida mashina beton to‘siqqa urilib, to‘siqni surib tashlab, 50 metr pastlikka qulagani haqida xabar berilgandi.