Ijtimoiy tarmoqlarda mashhur bo‘lish istagida hayot uchun xavfli ko‘rinishni namoyish etib, uni sherigining qo‘l telefoniga tasvirga oldirgan tasvirchiga nisbatan chora ko‘rildi, deya xabar bermoqda “Zamon” informatsion dasturi.
Ma’lum qilinishicha, mashina oynasidan tanasini chiqarib, hayot uchun xavfli ko‘rinishda to‘y kortejini tasvirga olgan shaxs qo‘lga olingan.
Holat yuzasidan ushbu jarayonda qatnashgan avtomobillar jarima maydoniga keltirilgan.
“Sherigiga video olishini aytdi. Xavfli vaziyat bo‘lib, tushib ketasiz, desam, o‘zimga ishonaman, dedi. Bugun tasvirga olmasam bo‘lmaydi, deb shu ishni qildi”, — deydi haydovchilardan biri.
Internet yulduzi bo‘lish niyatida harakatlanib ketayotgan transport vositasida yo‘l harakati qoidalariga zid ko‘rinishni ijtimoiy tarmoqlarga tarqatgan ushbu shaxsni qolgan haydovchilar ham ogohlantirgan.
“O‘sha kuni ‘ZAGS’ga chiqdik, yo‘lda ketayotganimizda tasvirchi qarama-qarshi yo‘lga chiqib turib yonboshlab, videoga olgani sabab biz jarima maydonidamiz. Bu bolani ogohlantirganmiz. Tasvirchi o‘zimga javob beraman degan”, — deydi boshqa bir haydovchi.
Tasvirchining o‘zi esa qilgan ishidan afsusda ekanini ma’lum qilgan.
“Men sherigimga TikTok ilovasiga video yuklashimni aytdim va tasvirga olishini so‘radim. Keyin shuni internet sahifasiga joyladik. Bu ishimdan pushaymonman. Hamkasblarimdan bu ishni takrorlamasligini so‘rayman”, — deydi ayblanuvchi.
Tasvirchiga nisbatan tegishli tartibda chora ko‘rilgan.
Bundan avval samarqandlik ikki yigit TikTok’da layk yig‘ish uchun o‘zini tomdan tashlagani hamda harakatlanayotgan Spark ustiga chiqib olgan yigit videosini TikTok’ga joylashtirganlar jarimaga tortilgani haqida xabar berilgandi.
Izoh (0)