Фарғона вилоятининг Бағдод туманида «Жигули» автомобилининг каналга тушиб кетиши оқибатида машина салонида бўлган бир оиланинг уч нафар вакили вафот этди, дея хабар бермоқда «Дарё» мухбири.
Маълум қилинишича, 2021 йил 13 февраль куни соат 13:30 ларда Катта Фарғона каналининг Бағдод тумани, «Ултарма» маҳалласи, Жар қишлоғи ҳудудидан ўтган қисмида «ВАЗ-2101» автомобили сувга тушиб кетган.
Дастлабки суриштирув натижаларига кўра, Бувайда тумани «Қўнғирот» маҳалласидаги Алимерган қишлоғида яшаган, 1992 йилда туғилган А.У. автомобиль салонида бўлган турмуш ўртоғи билан ўзаро жанжаллашиб қолган ва жаҳл устида машинасини Катта Фарғона каналига тушириб юборган.
Қайд этилишича, ҳайдовчи А.У., унинг 1998 йилда туғилган турмуш ўртоғи А.М. ва 2016 йилда туғилган қизи А.М.нинг жасадлари автомашина салонидан топилган.
Суриштирув жараёнида аниқланишича, ҳайдовчи А.У. турмуш ўртоғи А.М. билан 2019 йилнинг ноябрь ойидан буён оилавий келишмовчилик сабабли алоҳида яшаб келган. 2021 йил 18 январь куни А.У. бирга яшаш мақсадида турмуш ўртоғини яшаш хонадонига олиб келган ва онасидан кечирим сўрашини айтган. Бироқ А.М. қайнонасидан кечирим сўрамасдан, ўзаро жанжаллашиб, яна ўз уйига кетиб қолган.
Мазкур ҳолат юзасидан Боғдод тумани ИИБ тергов бўлинмаси томонидан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлса) билан жиноят иши қўзғатилган.
Аввалроқ Қашқадарёда Lacetti ҳайдовчисининг рулда ухлаб қолиши оқибатида машина бетон тўсиққа урилиб, тўсиқни суриб ташлаб, 50 метр пастликка қулагани ҳақида хабар берилганди.
Изоҳ (0)