Ijtimoiy tarmoqda 2021-yilning 15-fevral kuni avtomobil oynalari tusini o‘zgartirish (qoraytirish) narxi arzonlashgani haqida xabar tarqaldi.
Tarmoqda tarqalgan xabarda aytilishicha, “Tusi o‘zgartirilgan (qoraytirilgan) oynali yengil avtotransport vositalaridan foydalanishni tartibga solishning qo‘shimcha chora-tadbirlari to‘g‘risida”gi Vazirlar Mahkamasining qarori qabul qilingan. Qarorga muvofiq, “tonirovka” narxlari orqa oyna (lobovoy) uchun tekin, orqa yon oyna uchun esa quyidagicha narxlar belgilanadi:
- jismoniy va yuridik shaxslarga — bazaviy hisoblash miqdori (BHM)ning 5 baravari (1 million 115 ming so‘m);
- xorijiy davlatlar yuridik shaxslariga — BHMning 20 baravari (4 million 460 ming so‘m).
- jismoniy va yuridik shaxslarga — BHMning 25 baravari (5 million 575 ming so‘m);
- xorijiy davlatlar yuridik shaxslariga — BHMning 80 baravari (17 million 840 ming so‘m) etib belgilandi.
Qayd etilishicha, Vazirlar Mahkamasining 2018-yil 18-iyuldagi “Tusi o‘zgartirilgan (qoraytirilgan) oynali avtotransport vositalaridan foydalanishni tartibga solish chora-tadbirlari to‘g‘risida”gi 547-sonli qarorining 2-bandi, “v” kichik bandiga ko‘ra, M1, N1 va N2 toifaga oid avtotransport vositalari oynalarining tusini o‘zgartirishga (qoraytirishga) ruxsatnoma berish uchun to‘lov stavkalari:
- orqa yon oynalar bo‘yicha jismoniy shaxslar uchun — BHMning besh baravari miqdorini, yuridik shaxslar uchun BHMning o‘n baravari miqdorini va O‘zbekistonda faoliyat ko‘rsatayotgan xorijiy davlatlar yuridik shaxslari uchun BHMning yigirma baravari miqdorini;
- orqa va old yon oynalar bo‘yicha jismoniy shaxslar uchun BHMning ellik baravari miqdorini, yuridik shaxslar uchun BHMning ellik baravari miqdorini va O‘zbekistonda faoliyat ko‘rsatayotgan xorijiy davlatlar yuridik shaxslari uchun BHMning sakson baravari miqdorini tashkil etadi.
Ta’kidlanishicha, ushbu qaror talablari ayni vaqtda amalda bo‘lib, ijtimoiy tarmoqlarda tarqatilgan xabarlar asossiz ma’lumot hisoblanadi, deyiladi xabarda.
Bundan avval O‘zbekistonda “tonirovka” uchun ruxsatnomalarni Yagona interaktiv davlat xizmatlari portali orqali ham berish boshlangani, qariyb 1,5 yilda “tonirovka” uchun 302 milliard so‘mdan ortiq mablag‘ undirilgani hamda yuk mashinalari va avtobuslarning oynalarini “tonirovka” qilishga ruxsat berilgani haqida xabar berilgandi.
Izoh (0)