Kolumbiya poytaxti Bogotada 8-iyun kuni Rixter shkalasi bo‘yicha 6,5 magnitudali zilzila sodir bo‘ldi. Bu haqda Euronews xabar berdi.
Zilzila 10 km chuqurlikda qayd etilgan va u mamlakatning katta qismida sezilgan. Qurbonlar haqida xabar berilmagan. Zilzila mahalliy vaqt bilan soat 08:08 da poytaxt Bogotadan taxminan 186 kilometr janubi-sharqda joylashgan Paratebueno shahridan 17 kilometr shimoli-sharqda sodir bo‘lgan.
Kolumbiya Geologiya xizmati xuddi shu hududda bir necha daqiqadan so‘ng magnitudasi 4 dan 4,6 gacha bo‘lgan qo‘shimcha silkinishlar sodir bo‘lganini ma’lum qilgan. Tabiiy ofatlar xavfini boshqarish milliy bo‘limi X tarmog‘ida bir nechta hududlarda vaziyatni baholayotganini aytgan.
Kolumbiya Tinch okeani olovli halqasida joylashgan bo‘lib, bu hududda tez-tez seysmik va vulqon faolligi sodir bo‘lib turadi.
Oldinroq Turkiyaning janubi-g‘arbiy sohillarida ham 5,8 magnitudali zilzila sodir bo‘lgani haqida xabar berilgan edi. Zilzila epimarkazi Egey dengizida, Marmaris shahridan 10,43 km uzoqlikda bo‘lgan. O‘choq esa 67,91 kilometr chuqurlikda joylashgan edi. Mug‘la gubernatori Idris Oqbiyiq zilziladan keyin vahimaga tushib balandlikdan sakragan 34 kishi jarohatlanganini aytgan. Jami jarohatlanganlar soni 69 kishini tashkil etgan. Yer silkinishi tufayli 14 yoshli bola vahimaga tushib, vafot etgan. Jami 55 kishi shifoxonalarga murojaat qilgan. 14 nafar odam shifoxonaga borishga rozi bo‘lmay, joyida davolangan.
Izoh (0)