Ўзбекистонда «тонировка» нархлари арзонлашгани ҳақида тарқалган хабарларга муносабат билдирилди

Ижтимоий тармоқда 2021 йилнинг 15 февраль куни автомобиль ойналари тусини ўзгартириш (қорайтириш) нархи арзонлашгани ҳақида хабар тарқалди.

Тармоқда тарқалган хабарда айтилишича, «Туси ўзгартирилган (қорайтирилган) ойнали енгил автотранспорт воситаларидан фойдаланишни тартибга солишнинг қўшимча чора-тадбирлари тўғрисида»ги Вазирлар Маҳкамасининг қарори қабул қилинган. Қарорга мувофиқ, «тонировка» нархлари орқа ойна (лобовой) учун текин, орқа ён ойна учун эса қуйидагича нархлар белгиланади:

• жисмоний ва юридик шахсларга — базавий ҳисоблаш миқдори (БҲМ)нинг 5 баравари (1 миллион 115 минг сўм);
• хорижий давлатлар юридик шахсларига — БҲМнинг 20 баравари (4 миллион 460 минг сўм).

• жисмоний ва юридик шахсларга — БҲМнинг 25 баравари (5 миллион 575 минг сўм);
• хорижий давлатлар юридик шахсларига — БҲМнинг 80 баравари (17 миллион 840 минг сўм) этиб белгиланди.

Қайд этилишича, Вазирлар Маҳкамасининг 2018 йил 18 июлдаги «Туси ўзгартирилган (қорайтирилган) ойнали автотранспорт воситаларидан фойдаланишни тартибга солиш чора-тадбирлари тўғрисида»ги 547-сонли қарорининг 2-банди, «в» кичик бандига кўра, М1, Н1 ва Н2 тоифага оид автотранспорт воситалари ойналарининг тусини ўзгартиришга (қорайтиришга) рухсатнома бериш учун тўлов ставкалари:

• орқа ён ойналар бўйича жисмоний шахслар учун — БҲМнинг беш баравари миқдорини, юридик шахслар учун БҲМнинг ўн баравари миқдорини ва Ўзбекистонда фаолият кўрсатаётган хорижий давлатлар юридик шахслари учун БҲМнинг йигирма баравари миқдорини;
• орқа ва олд ён ойналар бўйича жисмоний шахслар учун БҲМнинг эллик баравари миқдорини, юридик шахслар учун БҲМнинг эллик баравари миқдорини ва Ўзбекистонда фаолият кўрсатаётган хорижий давлатлар юридик шахслари учун БҲМнинг саксон баравари миқдорини ташкил этади.

Таъкидланишича, ушбу қарор талаблари айни вақтда амалда бўлиб, ижтимоий тармоқларда тарқатилган хабарлар асоссиз маълумот ҳисобланади, дейилади хабарда.

Бундан аввал Ўзбекистонда «тонировка» учун рухсатномаларни Ягона интерактив давлат хизматлари портали орқали ҳам бериш бошлангани, қарийб 1,5 йилда «тонировка» учун 302 миллиард сўмдан ортиқ маблағ ундирилгани ҳамда юк машиналари ва автобусларнинг ойналарини «тонировка» қилишга рухсат берилгани ҳақида хабар берилганди.