Oltoy o‘lkasi — qushlar qish mavsumida ham qoladigan Rossiyadagi yagona hudud hisoblanadi. Oqqushlar har yili muzlamaydigan Oltoy ko‘llariga qishlash uchun uchib keladi. Shu sababli 1970-yilda oqqushlarni himoya qilish maqsadida Oltoy tog‘ yonbag‘rida tabiat qo‘riqxonasi tashkil etilgan.
Oltoy o‘lkasida -40 darajali sovuqda ham muzlamaydigan ko‘llar bor. Buloq suvlari tufayli yilning har qanday davrida suv harorati 4-6 daraja iliq bo‘ladi. Bu esa qushlar uchun qulay muhit yaratadi.
Dastlabki yillarda bu yerda 10 dan ortiq qush qishlagan. Hozirda esa har qish mavsumida ko‘lda yuzlab oqqushlar, minglab o‘rdaklar qishlaydi. Qushlar qo‘riqxona xodimlari tomonidan oziqlantiriladi, brakonyerlardan himoya qilinadi.
Oqqush ko‘li — Oltoy o‘lkasining tashrif qog‘ozi bo‘lib, turistlarning ko‘p qismi aynan qushlarni tomosha qilish uchun bu yerga keladi. Ular bu qushlar omad olib keladi, deb hisoblaydi.
Qiziqarli ma’lumot:
- Oqqushlar go‘zalligi hamda uzoq umr ko‘rishi bilan boshqa qushlardan farq qiladi.
- Oqqush tanasida 25 mingtadan ortiq pat mavjud. Tullash mavsumida juda ko‘p patidan ayriladi. Natijada ma’lum muddat parvoz qila olmaydi.
- Oqqushlarning ko‘rish qobiliyati juda yuqori. Bu suv ostida ham o‘ljasini darrov payqashi, kushandalardan o‘z vaqtida qochib qolishiga yordam beradi.
- Oqqushlar qo‘lga juda tez o‘rganadi. Ular uy sharoitida 30 yilgacha umr ko‘rishi mumkin.
- Oqqushlar 8500 metr balandlikda ham sira qiynalmasdan ucha oladi.
Izoh (0)